UPI చార్జీల ఎఫెక్ట్.. దూసుకుపోతున్న పేటీఎం షేర్లు.. కొనుగోలుపై నిపుణులు కీలక సూచన..

నేషనల్ పేమెంట్స్ కార్పొరేషన్ ఆఫ్ ఇండియా (NPCI) అక్టోబర్ 15, 2026 నుండి అమలు చేయనున్న సరికొత్త యూపీఐ (UPI) మర్చంట్ డిస్కౌంట్ రేట్ (MDR) నిబంధనలు చెల్లింపుల దిగ్గజం వన్97 కమ్యూనికేషన్స్ (Paytm) కంపెనీకి ఆర్థికంగా భారీ లబ్ధిని చేకూర్చనున్నాయి. ఈ సానుకూల వార్తల నేపధ్యంలో సెప్టెంబర్ 16వ తేదీన బీఎస్ఈ మరియు ఎన్ఎస్ఈలలో పేటీఎం షేరు ధర తీవ్ర కొనుగోళ్ల మద్దతుతో దూసుకెళ్లింది.

ట్రేడింగ్ ప్రారంభంలో బీఎస్ఈలో ఒక్కో షేరు రూ. 1,856.50 వద్ద సరికొత్త 52 వారాల గరిష్ఠ స్థాయిని తాకింది. ఆ తర్వాత లాభాల స్వీకరణ జరిగినప్పటికీ, వార్త రాసే సమయానికి షేరు ధర 1.40 శాతం లాభంతో రూ. 1,755.25 వద్ద కొనసాగగా, కంపెనీ మొత్తం మార్కెట్ క్యాపిటలైజేషన్ రూ. 1,12,618.21 కోట్లకు చేరింది. ఎన్‌పీసీఐ నూతన విధానం ప్రకారం రూ. 2,000 పైబడిన పర్సన్-టు-మర్చంట్ (P2M) యూపీఐ లావాదేవీలపై 0.4 శాతం రుసుము విధించనుండగా.. రూ. 75,000 దాటిన లావాదేవీలకు గరిష్టంగా రూ. 300 ఎండీఆర్ పరిమితిని నిర్ణయించారు.

నెలకు కోట్లాది లావాదేవీలను ప్రాసెస్ చేసే యూపీఐ వ్యవస్థలో సైబర్ సెక్యూరిటీ, కస్టమర్ సేవలు, సాంకేతిక మౌలిక సదుపాయాల బలోపేతానికి ఈ నిధులు ఉపయోగపడతాయని ఎన్‌పీసీఐ తెలిపింది. పాత చెల్లింపు మార్గాలైన క్రెడిట్, డెబిట్ కార్డులతో పోలిస్తే యూపీఐ ఎండీఆర్ చాలా స్వల్పంగా, సరసమైన రీతిలోనే ఉంచబడింది.

కొత్త నిబంధనల వల్ల పేటీఎం చెల్లింపుల వ్యాపారం నిర్మాణాత్మకంగా స్వయం సమృద్ధిని సాధించి, వ్యాపార నమూనా మరింత బలపడుతుందని విశ్లేషిస్తూ ప్రముఖ గ్లోబల్ బ్రోకరేజ్ సంస్థలైన జెఫరీస్, గోల్డ్‌మన్ సాక్స్, ఎంకే గ్లోబల్ పేటీఎం షేరుకు 'కొనుగోలు' (BUY) రేటింగ్‌లను ఖరారు చేశాయి. పేటీఎం ఆర్థిక స్థితిపై జెఫరీస్ విశ్లేషకులు మాట్లాడుతూ.. గతంలో ఊహించిన 20-25 శాతానికి అదనంగా ఆదాయాలను FY28-29 నాటికి మరో 10-12 శాతం పెంచుతున్నట్లు ప్రకటించారు. అలాగే FY27 ఆర్థిక సంవత్సరంలో కంపెనీ నికర లాభం 18 శాతం వరకు పెరిగే అవకాశం ఉందని అంచనా వేస్తూ, తమ పాత టార్గెట్ ధరను సవరిస్తూ ఒక్కో షేరుకు రూ. 2,150 కొత్త టార్గెట్‌ను నిర్ణయించి కొనుగోలు సంకేతాన్ని ఇచ్చారు.

అదేవిధంగా, ఎంకే గ్లోబల్ విశ్లేషకులు తమ డిసిఎఫ్ (DCF) వాల్యుయేషన్ల ఆధారంగా పేటీఎం టార్గెట్ మార్కెట్ క్యాప్‌ను రూ. 1,536 బిలియన్లకు పెంచారు. ఎండీఆర్ ఆదాయ ప్రవాహం తోడవడంతో పేటీఎం టార్గెట్ ధరను ఏకంగా 41.2 శాతం పెంచి, పాత లక్ష్యమైన రూ. 1,700 నుండి రూ. 2,400కి సవరించారు, ఇది ప్రస్తుత స్థాయి నుండి దాదాపు 38.2 శాతానికి పైగా వృద్ధి అవకాశాన్ని ప్రతిబింబిస్తోంది.

మరోవైపు గోల్డ్‌మన్ సాక్స్ విశ్లేషణ ప్రకారం.. పెట్టుబడిదారులు అంచనా వేసిన 20 నుండి 30 బేసిస్ పాయింట్ల కంటే ఎక్కువగా P2M యూపీఐపై 40 బేసిస్ పాయింట్ల ఎండీఆర్ ఖరారైంది. నెలకు రూ. 1 లక్ష లోపు టర్నోవర్ ఉన్న చిన్న వ్యాపారులకు ఈ రుసుముల నుండి మినహాయింపు ఇచ్చినప్పటికీ, FY27లో పేటీఎంకు దాదాపు రూ. 14 బిలియన్ల అదనపు EBITDA సమకూరే అవకాశం ఉందని తెలిపారు. ఆయా పరిణామాల ద్వారా FY28 నాటికి ఈబిట్డా (EBITDA) 40 నుండి 70 శాతం వరకు పెరుగుతుందని స్పష్టం చేస్తూ గోల్డ్‌మన్ సాక్స్ రూ. 1,500 టార్గెట్ ధరతో తమ 'బై' రేటింగ్‌ను కొనసాగించింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.