ఒక్కరోజులో 6.5% పడిపోయిన ఒరాకిల్ షేర్.. రూ. 1.5 లక్షల కోట్ల అప్పుపై పెరుగుతున్న ఆందోళన..

Oracle Financial Services Share: భారతీయ ఐటీ దిగ్గజం ఒరాకిల్ ఫైనాన్షియల్ సర్వీసెస్ సాఫ్ట్‌వేర్ (OFSS) షేర్లు సెప్టెంబర్ 21న మార్కెట్లో తీవ్ర పతనాన్ని చవిచూశాయి. బిఎస్‌ఇ, ఎన్ఎస్ఈలలో కంపెనీ షేరు ధర ఏకంగా 6.87 శాతం క్షీణించి రూ. 11,079 వద్ద ముగిసింది.

అమెరికాలోని ప్రముఖ టెక్నాలజీ దిగ్గజం ఒరాకిల్ కార్పొరేషన్‌కు సంబంధించిన సుమారు $18 బిలియన్ల (రూ. 1.5 లక్షల కోట్ల పైమాటే) భారీ డేటా సెంటర్ ప్రాజెక్ట్ రుణం తీవ్ర ఒత్తిడిలో పడిందనే వార్తలు వెలువడటమే ఈ పతనానికి ప్రధాన కారణంగా నిలిచింది. ఫైనాన్షియల్ టైమ్స్ ప్రచురించిన కథనం ప్రకారం.. న్యూ మెక్సికోలోని ప్రాజెక్ట్ కోసం సేకరించిన ఈ భారీ రుణాన్ని ఇతరులకు విక్రయించేందుకు చేసిన యత్నాలు నిలిచిపోవడం ఇన్వెస్టర్ల సెంటిమెంట్‌ను దెబ్బతీసింది.

ఈ $18 బిలియన్ల రుణం న్యూ మెక్సికోలోని డోనా అనా కౌంటీలో సుమారు 1,400 ఎకరాల్లో నిర్మిస్తున్న 'ప్రాజెక్ట్ జూపిటర్' డేటా సెంటర్ క్యాంపస్‌కు సంబంధించినది. ఆర్టిఫిషియల్ ఇంటెలిజెన్స్ (AI) దిగ్గజం ఓపెన్ ఏఐ (OpenAI) కి అవసరమైన అత్యంత సామర్థ్యంతో కూడిన కంప్యూటింగ్ సదుపాయాలను అందించడానికి ఒరాకిల్-ఓపెన్ ఏఐ మధ్య కుదిరిన చారిత్రక ఒప్పందంలో ఈ ప్రాజెక్ట్ భాగం.

ఈ మౌలిక వసతుల నిర్మాణం కోసం శాంటాండర్, జెఫరీస్ నేతృత్వంలోని బ్యాంకుల కన్సార్టియం నుండి గతేడాది $18 బిలియన్ల రుణాన్ని సమకూర్చారు. అయితే ప్రస్తుత అనిశ్చితుల నేపథ్యంలో రుణం అందించిన బ్యాంకులు దాని విలువను అసలు కంటే 9 నుండి 11 శాతం తక్కువగా.. అంటే డాలరుకు 89 నుండి 91 సెంట్లుగా లెక్కిస్తుండటంతో రుణ విక్రయ ప్రక్రియ మూలపడింది.

Also Read

లాభాలతో ప్రారంభమైన స్టాక్ మార్కెట్.. 400 పాయింట్లు జంప్ చేసిన సెన్సెక్స్.. 23,380 దాటిన నిఫ్టీ..

ఒరాకిల్ అప్పుల భారం విపరీతంగా పెరిగిపోవడం, కంపెనీ క్రెడిట్ రేటింగ్ క్షీణించడం ఈ సంక్షోభాన్ని మరింత సంక్లిష్టం చేసింది. ఎస్&పి (S&P) క్రెడిట్ రేటింగ్ సంస్థ జూలైలోనే ఒరాకిల్ రేటింగ్‌ను తగ్గించగా.. ప్రస్తుతం అది జంక్/రిస్క్ కేటగిరీకి కేవలం ఒకే ఒక్క స్థాయి పైన ఉనికిలో ఉంది. రేటింగ్ తగ్గుదల వల్ల రుణాన్ని ఇతరులకు బదిలీ చేయలేక బ్యాంకులు దాన్ని తమ స్వంత బ్యాలెన్స్ షీట్లలోనే భరించాల్సిన తీవ్ర ఒత్తిడి ఎదుర్కొంటున్నాయి.

దీనికి తోడు ప్రాజెక్ట్ జూపిటర్ నిర్మాణానికి నీటి వనరులు, వాయు కాలుష్యం కారణాలు చూపి స్థానిక ప్రజల నుండి తీవ్ర నిరసనలు వ్యక్తమవుతున్నాయి. ప్రాజెక్ట్‌కు కావలసిన 2.2 గిగావాట్ల గ్యాస్ టర్బైన్ల కోసం సహజ వాయువు పైప్‌లైన్ విస్తరణను న్యూ మెక్సికో స్టేట్ ల్యాండ్ ఆఫీస్ నిరోధించడం ప్రాజెక్ట్ విద్యుత్ ప్రణాళికను దెబ్బతీసింది.

ఆర్టిఫిషియల్ ఇంటెలిజెన్స్ మౌలిక వసతుల కోసం ఒరాకిల్ విపరీతంగా మూలధన వ్యయాన్ని (Capex) పెంచుతూ అప్పులను ప్రోగ్రేమ్ చేస్తోంది. 2026 ఆర్థిక సంవత్సరంలో కంపెనీ $43 బిలియన్ల రుణాన్ని సేకరించగా.. 2027 ఆర్థిక సంవత్సరంలో అప్పు, ఈక్విటీ ద్వారా మరో $40 బిలియన్లను సేకరించాలని ప్రణాళిక సిద్ధం చేసుకుంది. ఈ క్రమంలో రుణ సంక్షోభం వెలుగులోకి రావడంతో ఒరాకిల్‌లో రూ. 70,000 కోట్ల ($7.3 బిలియన్లు) భారీ వాటా విలువ కలిగిన భారతీయ అనుబంధ సంస్థ ఓఎఫ్‌ఎస్ఎస్ (OFSS) షేర్లపై నేరుగా ప్రతికూల ప్రభావం పడింది. అప్పుల భారం, ఏఐ ప్రాజెక్టుల పురోగతిపై స్పష్టత వచ్చే వరకు ఓఎఫ్‌ఎస్ఎస్ స్టాక్‌లో ఒత్తిడి కొనసాగవచ్చని ఆర్థిక విశ్లేషకులు భావిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.