మెటల్ రంగంలో అమ్మకాల సునామీ.. భారీ నష్టాలతో విలవిలలాడుతున్న ఈ టాప్ కంపెనీల ఇన్వెస్టర్లు..

Metal Stocks Today: శుక్రవారం నాటి ట్రేడింగ్‌లో దేశీయ స్టాక్ మార్కెట్లలో లోహ రంగానికి చెందిన అల్యూమినియం కంపెనీల షేర్లు తీవ్రమైన విక్రయాల ఒత్తిడిని ఎదుర్కొన్నాయి. యునైటెడ్ అరబ్ ఎమిరేట్స్ (UAE)లోని ప్రముఖ ఉత్పత్తిదారు 'ఎమిరేట్స్ గ్లోబల్ అల్యూమినియం' (EGA) సంస్థకు చెందిన 'అల్ తవీలా' (Al Taweelah) స్మెల్టర్ ప్లాంట్ పునరుద్ధరణ పనులు శరవేగంగా పురోగమించడమే ఇందుకు ప్రధాన కారణమైంది. గ్లోబల్ మార్కెట్‌లో అల్యూమినియం ఉత్పాదన సరఫరా అంచనాల కంటే ముందే భారీగా పెరగనుందనే నివేదికలు అంతర్జాతీయంగా లండన్ మెటల్ ఎక్స్ఛేంజ్ (LME)లోనూ, దేశీయంగా షేర్ల ధరల్లోనూ తీవ్ర ఆందోళనలను రేకెత్తించాయి.

ఈ ప్లాంట్ మూసివేతకు, ప్రస్తుత పునరుద్ధరణకు సంబంధించిన వివరాలను పరిశీలిస్తే.. గత మార్చి నెలలో పశ్చిమ ఆసియాలో చోటుచేసుకున్న సైనిక ఘర్షణలు, ఇరాన్ దాడుల కారణంగా అల్ తవీలా ప్లాంట్‌ను అత్యవసరంగా నిలిపివేయాల్సి వచ్చింది.యితే EGA తాజా నివేదిక ప్రకారం, ఈ ప్లాంట్‌లోని మొత్తం 1,262 రిడక్షన్ సెల్స్‌లో ఇప్పటికే 631 సెల్స్‌ను (50 శాతం సామర్థ్యాన్ని) విజయవంతంగా పునఃప్రారంభించినట్లు స్పష్టం చేసింది.

అంతేకాకుండా, 2027 మొదటి త్రైమాసికం నాటికి ప్లాంట్‌ను 100 శాతం పూర్తి ఉత్పత్తి సామర్థ్యానికి తీసుకువస్తామని కంపెనీ ధృవీకరించింది. గతంలో ఈ ప్లాంట్ ఏటా సుమారు 1.6 మిలియన్ టన్నుల ప్రాథమిక అల్యూమినియంను ఉత్పత్తి చేసేది. పశ్చిమ ఆసియా నుండి సరుకు మళ్లీ విపణిలోకి భారీగా రానుండటంతో గ్లోబల్ మార్కెట్‌లో సరఫరా కొరత తీరిపోతుందన్న భయం నెలకొంది.

ఈ అంతర్జాతీయ పరిణామాల దెబ్బకు దేశీయ స్టాక్ ఎక్స్ఛేంజీలలో బిఎస్ఇ, ఎన్ఎస్ఇలలో నమోదైన ప్రముఖ మెటల్ షేర్లు విలవిలలాడాయి. వేదాంత అల్యూమినియం కౌంటర్‌లో అత్యధిక విక్రయాలు కనిపించి.. ఇంట్రాడే ట్రేడింగ్‌లో ఈ షేరు 6 శాతం వరకు క్షీణించి రోజు కనిష్ట స్థాయి రూ. 336.55కి పడిపోయింది.

Also Read

ఇన్వెస్టర్లకు భారీ షాక్.. గంటల వ్యవధిలో రూ.9.03 లక్షల కోట్లు ఆవిరి.. స్టాక్ మార్కెట్ ఎందుకు కుప్పకూలుతోంది..

గత నెల రోజుల్లో ఈ షేరు ఏకంగా 23 శాతం విలువును కోల్పోయింది. నేషనల్ అల్యూమినియం కంపెనీ (నాల్కో) షేరు ఇంట్రాడేలో 5 శాతం క్షీణించి రూ. 293 స్థాయిని తాకింది. ఈ షేరు కూడా గడిచిన నెల రోజుల్లో 18 శాతానికి పైగా నష్టపోయింది. ఇక ఆదిత్య బిర్లా గ్రూప్ దిగ్గజం హిండాల్కో ఇండస్ట్రీస్ షేరు సుమారు 4 శాతం క్షీణించి రూ. 852 స్థాయికి దిగజారింది. ఈ కౌంటర్ గత నెల రోజుల్లో 14 శాతానికి పైగా పతనాన్ని నమోదు చేసింది.

ప్రపంచ మార్కెట్లో అల్యూమినియం ధరలు ఇప్పటికే ఈ ఏడాది గరిష్ట స్థాయి అయిన టన్నుకు $3,800 డాలర్ల నుండి పడిపోయి ప్రస్తుతం టన్నుకు సుమారు $3,020 డాలర్ల వద్ద ఊగిసలాడుతున్నాయి. పశ్చిమ ఆసియాలో స్మెల్టర్ల పునఃప్రారంభంతో పాటు ఇతర గ్లోబల్ ప్రాంతాల నుండి ఉత్పత్తులు రావడం, చైనా ప్రభుత్వం ఎగుమతులపై 30 శాతం సుంకం విధించినప్పటికీ ఆ దేశం నుండి సరఫరా ఆగకపోవడం వంటి ప్రతికూలతలు అల్యూమినియం ధరలను మరింత దిగువకు నెడుతున్నాయి.

ప్రముఖ అంతర్జాతీయ బ్రోకరేజ్ సంస్థ 'యాక్సిస్ క్యాపిటల్' అల్యూమినియం రంగంపై తన ప్రతికూల (Negative) దృక్పథాన్ని స్పష్టం చేసింది. రాబోయే 2027 నాటికి ప్రపంచ అల్యూమినియం మార్కెట్‌లో సరఫరా తీవ్రమై డిమాండ్‌ను మించిపోతుందని (Over-supply) అంచనా వేసింది.

దీని మూలంగా లండన్ మెటల్ ఎక్స్ఛేంజ్ (LME)లో అల్యూమినియం ధర టన్నుకు $2,800 డాలర్లకు దిగిరావచ్చని.. ఇది ప్రస్తుత ధరల కంటే మరో 7 శాతం అదనపు తగ్గుదలను సూచిస్తుందని విశ్లేషించింది. ప్రస్తుత సంవత్సరంలో కాపర్ (+15%), జింక్ (+18.5%) వంటి ఇతర పారిశ్రామిక లోహాలు రాణిస్తున్నప్పటికీ, అల్యూమినియం విపణి మాత్రం తీవ్ర నష్టాలతో వెనుకబడిపోయిందని మార్కెట్ నిపుణులు విశ్లేషిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.