ఈ కంపెనీ షేర్లలో రూ.1,949 కోట్ల భారీ బ్లాక్ డీల్..ఇన్వెస్టర్లు ఈ స్టాక్ మీద ఓ కన్నేసి ఉంచండి..

ప్రముఖ ఈ-కామర్స్ దిగ్గజం మీషో (Meesho) స్టాక్ మార్కెట్‌లో తీవ్రమైన కదలికలతో సందడి చేసింది. కంపెనీకి చెందిన ప్రారంభ వెంచర్ క్యాపిటల్ పెట్టుబడిదారులు తమ వాటాలను విక్రయించడంతో మార్కెట్‌లో సుమారు రూ. 1,949 కోట్ల విలువైన భారీ బ్లాక్ డీల్ (Block Deal) నమోదైంది. ఈ లావాదేవీ ద్వారా కంపెనీ మొత్తం ఈక్విటీలో దాదాపు 2.27 శాతానికి సమానమైన 10.48 కోట్ల షేర్లు చేతులు మారినట్లు మార్కెట్ వర్గాలు ధ్రువీకరించాయి.

ఈ భారీ బ్లాక్ డీల్ సగటున ఒక్కో షేరుకు రూ. 186 ఆఫర్ ధరకు అమలైంది. ప్రారంభంలో ఇన్వెస్టర్ల నిష్క్రమణతో ఒత్తిడి ఉంటుందని విశ్లేషకులు అంచనా వేసినప్పటికీ.. అంతర్జాతీయ సంస్థాగత ఇన్వెస్టర్లు ఈ షేర్ల సప్లైని సునాయాసంగా కొనుగోలు చేశారు. దీనికి సానుకూలంగా స్పందించిన మీషో షేరు ధర ట్రేడింగ్ ప్రారంభంలోనే దాదాపు 3 శాతం మేర పెరిగి రూ. 195.90 వద్ద గరిష్ట స్థాయిని తాకింది. విశ్లేషణ ప్రకారం.. కంపెనీ ప్రారంభ పెట్టుబడిదారులైన పీక్ XV పార్ట్‌నర్స్ (Peak XV Partners) మరియు ఎలివేషన్ క్యాపిటల్ (Elevation Capital) తమ వద్ద ఉన్న వాటాల్లో కొంత భాగాన్ని దీర్ఘకాలిక లాభాల స్వీకరణలో భాగంగా విక్రయించినట్లు తెలుస్తోంది.

ఇటీవల వెల్లడించిన ఆర్థిక ఫలితాలలో మీషో మెరుగైన పనితీరును కనబరిచింది. జూన్ త్రైమాసికంలో కంపెనీ కార్యకలాపాల ద్వారా వచ్చిన ఆదాయం గత ఏడాదితో పోలిస్తే 48 శాతం పెరిగి రూ. 3,712.8 కోట్లకు చేరుకుంది. అలాగే, కంపెనీ నికర నష్టం క్రితం ఏడాది నమోదైన రూ. 289.4 కోట్లతో పోలిస్తే దాదాపు సగానికి పైగా తగ్గి రూ. 132.8 కోట్లకు పరిమితమైంది. ఆర్డర్ల సంఖ్య 29 శాతం వృద్ధితో 72.5 కోట్లకు చేరగా.. గ్రాస్ మెర్చండైజ్ వాల్యూ (NMV) ఏకంగా రూ. 11,614 కోట్లకు చేరుకోవడం విశేషం.

Also Read

వచ్చేవారం స్టాక్ మార్కెట్ కొంపలు ముంచబోయేది ఇదే.. పెట్టుబడిదారులు అలర్ట్ కావాలంటున్న నిపుణులు..

క్యాపిటల్ మార్కెట్‌లో షేర్ల విక్రయాలు ఒకవైపు నడుస్తుండగానే.. వ్యాపార విస్తరణ దిశగా మీషో కీలక ప్రణాళికను అమలు చేస్తోంది. రాబోయే పండుగ సీజన్ (Festive Season) షాపింగ్ డిమాండ్‌ను అందుకోవడానికి తమ విక్రేతలు, లాజిస్టిక్స్ నెట్‌వర్క్ ద్వారా పది లక్షలకు పైగా తాత్కాలిక ఉద్యోగాలను (Seasonal Jobs) సృష్టించనున్నట్లు ప్రకటించింది. గిడ్డంగులు, ప్యాకేజింగ్, ఇన్వెంటరీ నిర్వహణ కోసం సుమారు 1.3 లక్షల మంది కొత్త విక్రేతలను తమ వ్యవస్థలోకి తీసుకురానున్నట్లు పేర్కొంది.

పెద్ద ఎత్తున ప్రారంభ విసి (VC) ఇన్వెస్టర్లు తమ పొజిషన్లను ఉపసంహరించుకున్నప్పటికీ.. నాణ్యమైన సంస్థాగత ఇన్వెస్టర్లు కొనుగోలు చేయడానికి ముందుకు రావడం మీషో వ్యాపార నమూనా, దీర్ఘకాలిక భవిష్యత్తుపై మార్కెట్‌కు ఉన్న నమ్మకాన్ని స్పష్టం చేస్తోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.