స్టాక్ మార్కెట్ భారీగా క్రాష్.. బంగారం, వెండి కొనేందుకు పరిగెడుతున్న ఇన్వెస్టర్లు.. కారణం ఏంటంటే..

భారతీయ ఈక్విటీ మార్కెట్ ప్రస్తుతం అత్యంత కఠినమైన దశను ఎదుర్కొంటోందని ప్రముఖ ఫిన్‌ఫ్లూయెన్సర్, విజ్డమ్ హాచ్ వ్యవస్థాపకుడు అక్షత్ శ్రీవాస్తవ వ్యాఖ్యానించారు. స్టాక్ మార్కెట్‌లో కొనసాగుతున్న అస్థిరత కారణంగా.. చాలా మంది భారతీయ పెట్టుబడిదారులు ఈక్విటీ పెట్టుబడులను తగ్గించి లేదా పూర్తిగా విడిచిపెట్టి, బంగారం వంటి సురక్షిత పెట్టుబడుల వైపు మళ్లుతున్నారని ఆయన చెప్పారు. ఇది తాత్కాలికంగా మనశ్శాంతిని ఇస్తున్నప్పటికీ.. దీర్ఘకాలంలో భారతీయ పెట్టుబడులకు ఇది మంచిది కాదని ఆయన హెచ్చరించారు.

భారతీయ ఈక్విటీ మార్కెట్ ప్రస్తుతం ఎదుర్కొంటున్న దశ.. గతంలో చూసిన అత్యంత క్రూరమైన దశలలో ఒకటిగా మారుతోందని శ్రీవాస్తవ తెలిపారు. రోజువారీ మార్కెట్ ఒడిదుడుకులు, షేర్ ధరల పతనం కారణంగా పెట్టుబడిదారుల్లో భయం పెరిగిందని, అందుకే చాలామంది ఈక్విటీలను వదిలిపెట్టి బంగారం వైపు అడుగులు వేస్తున్నారని ఆయన వివరించారు. ఈ పెట్టుబడిదారుల రాబడులు ప్రస్తుతం ఈక్విటీ పెట్టుబడిదారుల కంటే మెరుగ్గా ఉన్నాయని కూడా ఆయన చెప్పారు.

ప్రత్యేకంగా Gold లేదా భూమి వంటి ఆస్తుల్లో పెట్టుబడి పెట్టినవారు రోజూ మార్కెట్ ధరలను పరిశీలించాల్సిన అవసరం లేకుండా ప్రశాంతంగా జీవిస్తున్నారని ఆయన వ్యాఖ్యానించారు. వారు పని చేస్తారు, డబ్బు సంపాదిస్తారు, భూమి లేదా బంగారం కొనుగోలు చేస్తారు, ఆపై ప్రశాంతంగా నిద్రపోతారు. ఈక్విటీ పెట్టుబడిదారుల్లా ప్రతి రోజు ధరల కదలికల గురించి ఆందోళన చెందాల్సిన అవసరం వారికి లేదని శ్రీవాస్తవ అన్నారు.

మార్కెట్‌లో ఇరుక్కుపోయిన పెట్టుబడిదారులకు సహాయంగా.. ఆయన కొన్ని కీలక అంశాలను ప్రస్తావించారు. మార్కెట్లు చివరికి తిరిగి కోలుకుంటాయని, ప్రస్తుతం ఎదురవుతున్న నష్టాలు శాశ్వతం కావని ఆయన స్పష్టం చేశారు. అలాగే, నెమ్మదిగా వృద్ధి చెందుతున్న లేదా బలహీనమైన కంపెనీలను కొంతమంది పెట్టుబడిదారులు నష్టాలతో అమ్మి ఉండవచ్చని చెప్పారు. ఇది నష్టాలను అంగీకరించి ముందుకు సాగడానికి ఒక ముఖ్యమైన పాఠమని ఆయన అభిప్రాయపడ్డారు.

ఈ దశాబ్దాలుగా నిజమైన పెట్టుబడి అనుభవం లేని వారికి, ఈ మార్కెట్ తిరోగమనం ఒక శిక్షణ వంటిదని ఆయన అన్నారు.మీరు అనుభవజ్ఞుడైన పెట్టుబడిదారుడిగా మారే ప్రయాణంలో ఉన్నారని ఆయన పేర్కొన్నారు. మార్కెట్లు బాగా ఉన్నప్పుడు చెడు వ్యూహాలు కూడా పనిచేసినట్లు అనిపిస్తాయని, కానీ కష్టకాలంలోనే పెట్టుబడిదారులు నిజమైన పాఠాలు నేర్చుకుంటారని ఆయన వ్యాఖ్యానించారు. చివరికి, మార్కెట్‌లో చాలా మంది కథలు అమ్మడానికే ఉన్నారని పెట్టుబడిదారులు గ్రహిస్తారని కూడా ఆయన అన్నారు.

మీ డబ్బును మీరు ఎలా నిర్వహించుకుంటారన్న బాధ్యత పూర్తిగా మీదే. రోజుకు 10 గంటలు డబ్బు సంపాదించడానికి కేటాయిస్తే, కనీసం ఒక గంట అయినా ఆ డబ్బును ఎలా నిర్వహించాలో నేర్చుకోవడానికి కేటాయించాలని శ్రీవాస్తవ సూచించారు.

ఇదిలా ఉండగా, సోమవారం మార్కెట్లు ప్రారంభంలో మిశ్రమ సంకేతాలు ఇచ్చాయి. నిఫ్టీ 50 ఉదయం 10 గంటల సమయంలో స్వల్పంగా 0.08 శాతం పెరిగి 25,493.3 వద్ద ట్రేడ్ అయింది. అదే సమయంలో బిఎస్ఇ సెన్సెక్స్ 0.07 శాతం లాభంతో 82,685.68 వద్ద కొనసాగింది. బ్యాంకింగ్, ఫైనాన్షియల్ స్టాక్స్ లాభపడగా, ఐటీ, మెటల్, కన్స్యూమర్, ఫార్మా షేర్లలో కొంత మేర కోలిక కనిపించింది.

జియోజిత్ ఇన్వెస్ట్‌మెంట్స్ చీఫ్ ఇన్వెస్ట్‌మెంట్ స్ట్రాటజిస్ట్ వికె విజయకుమార్ మాట్లాడుతూ.. సమీప భవిష్యత్తులో ఐటీ రంగంలో అమ్మకాలు మార్కెట్లపై ఒత్తిడి కొనసాగించే అవకాశముందని చెప్పారు. సంస్థాగత పెట్టుబడిదారులు ఐటీ స్టాక్స్ నుంచి నిష్క్రమించి.. ఆదాయ వృద్ధి స్పష్టంగా కనిపిస్తున్న రంగాల వైపు మళ్లే అవకాశం ఉందని ఆయన అభిప్రాయపడ్డారు.