స్టాక్ మార్కెట్‌ భారీ క్రాష్.. రూ. 6 లక్షల కోట్లు ఆవిరి.. మూడు రోజుల్లో సెన్సెక్స్ 2,600 పాయింట్లు ఢమాల్..

పశ్చిమ ఆసియాలో కొనసాగుతున్న యుద్ధ వాతావరణం, హోర్ముజ్ జలసంధి వద్ద ఏర్పడిన అనిశ్చితి, అంతర్జాతీయ మార్కెట్లో ముడి చమురు ధరల పెరుగుదల ప్రభావంతో భారత స్టాక్ మార్కెట్ వరుసగా మూడో రోజు తీవ్ర ఒత్తిడిని ఎదుర్కొంది. పెట్టుబడిదారుల్లో భయం పెరగడంతో భారీ అమ్మకాలు నమోదై సూచీలు గణనీయంగా క్షీణించాయి. ట్రేడింగ్ ప్రారంభం నుంచే నెగెటివ్ సెంటిమెంట్ కనిపించగా, మధ్యాహ్నానికి అమ్మకాల ఒత్తిడి మరింత పెరిగింది.

బీఎస్ఈ సెన్సెక్స్ ఒక దశలో 1,200 పాయింట్లకు పైగా క్షీణించినప్పటికీ చివరికి 982.71 పాయింట్లు లేదా 1.27 శాతం నష్టంతో 76,681.29 వద్ద ముగిసింది. నేషనల్ స్టాక్ ఎక్స్ఛేంజ్ నిఫ్టీ 50 సూచీ కూడా 275.10 పాయింట్లు లేదా 1.14 శాతం పడిపోయి 23,897.95 వద్ద స్థిరపడింది. గత రెండు సెషన్లలోనూ మార్కెట్ నష్టపోవడంతో, మూడు రోజుల్లో సెన్సెక్స్ దాదాపు 2,600 పాయింట్లు కోల్పోయింది. దీంతో పెట్టుబడిదారుల సంపదకు భారీ దెబ్బ తగిలింది.

Market పతనంతో బీఎస్ఈలో నమోదైన కంపెనీల మొత్తం మార్కెట్ విలువ సుమారు రూ.6 లక్షల కోట్లు తగ్గి రూ.460 లక్షల కోట్లకు చేరింది. ముఖ్యంగా ఐటీ రంగ షేర్లలో భారీ అమ్మకాలు చోటుచేసుకున్నాయి. హెచ్‌సీఎల్ టెక్నాలజీస్, ఇన్ఫోసిస్ షేర్లు రెండు శాతానికి పైగా పడిపోగా, టీసీఎస్, టెక్ మహీంద్రా, సన్ ఫార్మా, ఐసీఐసీఐ బ్యాంక్, పవర్‌గ్రిడ్, భారతీ ఎయిర్‌టెల్ వంటి షేర్లు కూడా ఒత్తిడికి లోనయ్యాయి. మరోవైపు ఎస్‌బీఐ, మహీంద్రా అండ్ మహీంద్రా, హిందుస్థాన్ యూనిలివర్, ఇండిగో వంటి కొన్ని షేర్లు స్వల్ప లాభాల్లో ముగిశాయి.

Also Read

స్టాక్ మార్కెట్ ఇన్వెస్టర్లకు బిగ్ అలర్ట్.. ఊహించని షాక్ ఇచ్చిన ప్రముఖ అంతర్జాతీయ బ్యాంక్ జేపీమోర్గాన్..

ఈ క్షీణతకు మరో ప్రధాన కారణం ప్రముఖ అంతర్జాతీయ ఇన్వెస్ట్‌మెంట్ బ్యాంక్ జేపీ మోర్గాన్ విడుదల చేసిన తాజా నివేదిక. భారత మార్కెట్‌పై గతంలో ఉన్న 'ఓవర్‌వెయిట్' రేటింగ్‌ను 'న్యూట్రల్'కు తగ్గిస్తూ సంస్థ సంచలన నిర్ణయం తీసుకుంది. అధిక స్టాక్ వాల్యుయేషన్లు, భౌగోళిక రాజకీయ ఉద్రిక్తతలు, పెరుగుతున్న చమురు ధరలు, కంపెనీల భవిష్యత్ లాభాలపై అనిశ్చితి కారణంగా ఈ నిర్ణయం తీసుకున్నట్లు పేర్కొంది.

జేపీ మోర్గాన్ అంచనా ప్రకారం పరిస్థితులు మరింత దిగజారితే నిఫ్టీ 50 సూచీ 20,500 స్థాయికి పడిపోయే ప్రమాదం ఉందని హెచ్చరించింది. ప్రస్తుతం 23,900 సమీపంలో ఉన్న నిఫ్టీ అక్కడికి చేరితే మరో 14 శాతం వరకు పతనం సంభవించే అవకాశం ఉంది. సాధారణ పరిస్థితుల్లో కూడా నిఫ్టీపై గత అంచనాలను తగ్గిస్తూ 27,000 స్థాయిని మాత్రమే సూచించింది.

భారత మార్కెట్‌కు దీర్ఘకాలికంగా వృద్ధి అవకాశాలు ఉన్నప్పటికీ, స్వల్పకాలంలో పెట్టుబడిదారులు జాగ్రత్తగా వ్యవహరించాలని నిపుణులు సూచిస్తున్నారు. అధిక రిస్క్ ఉన్న షేర్లలో తొందరపడి పెట్టుబడులు పెట్టకుండా, దశలవారీగా పెట్టుబడులు పెట్టడం మంచిదని చెబుతున్నారు. ఇదే సమయంలో అంతర్జాతీయ మార్కెట్లో బ్రెంట్ క్రూడ్ ధర బ్యారెల్‌కు 106 డాలర్లకు చేరుకోవడం ఆందోళన కలిగిస్తోంది. హోర్ముజ్ జలసంధి ద్వారా ప్రపంచ చమురు సరఫరాలో పెద్ద భాగం వెళ్లడం వల్ల అక్కడ ఉద్రిక్తతలు కొనసాగితే భారత మార్కెట్‌పై మరింత ఒత్తిడి పడే అవకాశం ఉందని విశ్లేషకులు భావిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.