మీ అదృష్టాన్ని పరీక్షించుకోండి.. త్వరలోనే అతిపెద్ద ఐపిఒ వస్తోంది..! ఈసారి వేల కోట్లు..

కళ్ళద్దాల తయారీ సంస్థ లెన్స్‌కార్ట్ ఇనీషియల్ పబ్లిక్ ఆఫర్ లేదా ఐపిఒ ప్రారంభించాలని యోచిస్తోంది. ఎకనామిక్ టైమ్స్ నివేదిక ప్రకారం, కంపెనీ $1 బిలియన్ (ప్రస్తుత విలువ - సుమారు రూ.8,684 కోట్లు) నిధులను $10 బిలియన్ (సుమారు రూ. 86,835 కోట్లు) విలువతో సేకరిస్తుంది. దీని కోసం, లెన్స్‌కార్ట్ ఈ సంవత్సరం మే నెలలో ముసాయిదా పత్రాలను దాఖలు చేయవచ్చు. లెన్స్‌కార్ట్ CEO పియూష్ బన్సాల్ ఇటీవల పెట్టుబడిదారులు ఇంకా IPO బ్యాంకర్లతో జరిగిన సంభాషణలో $1 బిలియన్ IPO అవకాశాన్ని లేవనెత్తారు. అయితే, దానిని ఖరారు చేసే ధర ఆ సమయంలో మార్కెట్ పరిస్థితులపై ఆధారపడి ఉంటుంది.

2024లో కంపెనీ విలువ
గత ఏడాది జూన్‌లో లెన్స్‌కార్ట్ $5 బిలియన్ల విలువతో $200 మిలియన్లు (సుమారు రూ.1,700 కోట్లు) సేకరించింది. అలాగే కంపెనీ గతంలో రెండవ రౌండ్‌లో $4.5 బిలియన్ల విలువతో డబ్బును సేకరించింది. సాఫ్ట్‌బ్యాంక్ ఇంకా టెమాసెక్ సపోర్ట్'తో లెన్స్‌కార్ట్ కళ్లజోడు రంగంలో ఆధిపత్యం చెలాయిస్తోంది. కంపెనీ వ్యాపారం కూడా లాభదాయకంగా ఉంది. అంతేకాదు థాయిలాండ్‌లో లెన్స్‌కార్ట్ వ్యాపారాన్ని వేగంగా విస్తరిస్తోంది.

IPO అంటే ఏమిటి?
ఒక కంపెనీ వాటాలను మొదటిసారిగా సాధారణ ప్రజలకు అందుబాటులో ఉంచినప్పుడు, దానిని ఇనీషియల్ పబ్లిక్ ఆఫరింగ్ లేదా IPO అంటారు. కంపెనీకి వ్యాపారాన్ని విస్తరించుకోవడానికి డబ్బు అవసరం కాబట్టి ఇలాంటి సమయంలో షేర్ మార్కెట్ నుండి లోన్ తీసుకోవడానికి బదులుగా కంపెనీ కొంత వాటాలను ప్రజలకు అమ్మడం ద్వారా లేదా కొత్త వాటాలను జారీ చేయడం ద్వారా డబ్బును సేకరిస్తుంది. ఈ కారణంగా కంపెనీ IPOని తీసుకువస్తోంది.

లెన్స్‌కార్ట్ 2010 లో ప్రారంభించబడింది.
భారతదేశంలోని ప్రజలు కళ్ళ అద్దాలు ధరించాల్సిన అలవాటును మార్చగల ఒక కంపెనీని సృష్టించాలని పియూష్ బన్సాల్ అలాగే కోల్‌కతాకు చెందిన ఒక స్నేహితుడు ప్లాన్ వేశారు. వీరికి లింక్డ్ఇన్‌లో మరో సహ వ్యవస్థాపకుడు సుమిత్ కపాహి కలిశాడు. సుమిత్ కపాహి కొన్ని నెలల క్రితం ఒక కళ్ళద్దాల తయారీ కంపెనీలో తన ఉద్యోగాన్ని వదిలేసాడు.

ఈ ముగ్గురూ కలిసి 2010లో వాల్యూ టెక్నాలజీని ఏర్పాటు చేశారు, దీనికి వివిధ ఇ-కామర్స్ వెబ్‌సైట్‌లు ఉన్నాయి. వీటిలో లెన్స్‌కార్ట్, జ్యువెల్‌కార్ట్, బాగ్‌కార్ట్ ఇంకా వాచ్‌కార్ట్ వెబ్‌సైట్‌లు ఉన్నాయి. కొంతకాలం తర్వాత కళ్లజోడు మార్కెట్‌లో సామర్థ్యాన్ని చూసి ఈ ముగ్గురూ లెన్స్‌కార్ట్‌పై మాత్రమే దృష్టి పెట్టడం స్టార్ట్ చేసారు.

ఆటోమేటిక్ ఉత్పత్తి యూనిట్
ఈ కంపెనీ ప్రపంచంలోనే మొట్టమొదటి ఆటోమేటిక్ తయారీ యూనిట్‌ను రాజస్థాన్‌లోని భివాడిలో ప్రారంభించింది. ప్రస్తుతం, దీనికి ఢిల్లీ, గురుగ్రామ్ ఇంకా చైనాలోని జెంగ్జౌలలో తయారీ యూనిట్లు ఉన్నాయి. ఈ కంపెనీ బెంగళూరులో రూ.1,600 కోట్ల వ్యయంతో కొత్త ప్లాంట్‌ను ఏర్పాటు చేయబోతోంది. రాబోయే 18 నెలల్లో ఉత్పత్తి కూడా ప్రారంభం కానుంది.