Monday Market: కొత్తవారం స్టాక్ మార్కెట్ల దారెటు.. పతనమా..? లేక పరుగులా..? టీసీఎస్..

Market Update: గతవారం దేశీయ స్టాక్ మార్కెట్లు ఒడిదొడుకులతో పాటు అనూహ్య ర్యాలీని కూడా నమోదు చేసిన సంగతి తెలిసిందే. ఈ క్రమంలో అందరి చూపు కొత్త ఏడాదిలో రానున్న వారం పైనే కొనసాగుతోంది. అయితే ఇన్వెస్టర్లు ఈక్విటీ మార్కెట్లలో ఎలా అప్రమత్తంగా ముందుకు సాగాలి, ఏఏ అంశాలు మార్కెట్లను ప్రభావితం చేయనున్నాయనే వివరాలను ప్రస్తుతం తెలుసుకుందాం..

ముందుగా స్టాక్ మార్కెట్లోని పెట్టుబడిదారులు ఆసక్తిగా ఈవారం గమనించటానికి వేచి ఉన్న అంశం గురువారం టాటా కన్సల్టెన్సీ సర్వీసెస్ విడుదల చేయనున్న మూడవ త్రైమాసిక ఫలితాల గురించే. దీంతో ఐటీ దిగ్గజం టీసీఎస్ కార్పొరేట్ ఎర్నింగ్స్ కొత్త సీజన్ గణాంకాల ప్రకటనను ప్రారంభించనుంది. దీనికి తోడు విదేశీ ఇన్వెస్టర్ల కార్యకలాపాలు, గ్లోబల్ మార్కెట్లు భారతీయ స్టాక్ మార్కెట్లకు దిశానిర్థేశంగా నిలవనున్నాయి. దీనికి తోడు స్థూల ఆర్థిక గణాంకాలు, డాలర్ రూపాయి మారకపు విలువ మార్కెట్లకు కీలకంగా మారనున్నాయని నిపుణులు చెబుతున్నారు. ముందుగా అక్టోబర్-డిసెంబర్ త్రైమాసికానికి సంబంధించి టీసీఎస్, టాటా ఈఎల్ఎక్స్ఐ ఫలితాలపై ఇన్వెస్టర్ల దృష్టి కొనసాగుతోందని స్వస్తిక ఇన్వెస్ట్‌మార్ట్ లిమిటెడ్ సీనియర్ రీసెర్చ్ ప్రవేశ్ గౌర్ పేర్కొన్నారు.

త్రైమాసిక ఫలితాలతో పాటు మార్కెట్ దృష్టి జనవరిలో అమెరికా అధ్యక్ష బాధ్యతలు చేపట్టనున్న అమెరికా అధ్యక్షుడు డొనాల్డ్ ట్రంప్ నిర్ణయాలు, భారత ప్రభుత్వం ప్రవేశపెట్టనున్న సాధారణ బడ్జెట్ ప్రసంగంపై కొనసాగుతోంది. చాలా కాలంగా విదేశీ సంస్థాగత ఇన్వెస్టర్లు విక్రయదారులుగా కొనసాగుతుండగా.. దేశీయ సంస్థాగత ఇన్వెస్టర్లు మాత్రం కొనుగోలుదారులుగా ఉన్నారు. ఈవారం మార్కెట్లను ముందుకు నడిపించటంలో వీరి పనితీరు కీలకంగా మారుతుందని ప్రవేశ్ గౌర్ అన్నారు. ఇదే క్రమంలో పెట్టుబడిదారులు తదుపరి సంకేతాల కోసం HSBC సర్వీసెస్ PMI, పారిశ్రామిక ఉత్పత్తి (IIP) డేటాపై ఒక కన్ను వేసి ఉంచుతారని రెలిగేర్ బ్రోకింగ్ వైస్ ప్రెసిడెంట్ అజిత్ మిశ్రా పేర్కొన్నారు.

గత త్రైమాసికంతో పోల్చితే ప్రస్తుత ఎర్నింగ్స్ కాల్ సమయంలో కంపెనీలు ఉత్తమ పనితీరుతో పాటు లాభాలను నమోదు చేస్తాయని జియోజిత్ ఫైనాన్షియల్ రీసెర్చ్ హెడ్ వినోద్ నాయర్ అభిప్రాయపడ్డారు. మెుత్తంగా గతవారం దేశీయ స్టాక్ మార్కెట్ల పనితీరును పరిశీలిస్తే.. బెంచ్ మార్క్ సూచీ సెన్సెక్స్ 524 పాయింట్లు పెరగగా.. మరో కీలక సూచీ నిఫ్టీ 191 పాయింట్లు పెరుగుదలను సూచించింది. అయితే ఈ వారం దేశీయ స్టాక్ మార్కెట్లు పైన పేర్కొన్న పరిణామాలపై ఆధారపడి ఉంటాయని నిపుణులు చెబుతున్నారు. ముఖ్యంగా మూడవ త్రైమాసిక ఫలితాలు ఇన్వెస్టర్ల సెంటిమెంట్లను ప్రభావితం చేస్తాయని ఇది ఇండివిడ్యువల్ స్టాక్స్ పనితీరును ప్రభావితం చేస్తాయని మార్కెట్ నిపుణులు చెబుతున్నారు.

Disclaimer: The recommendations made above are by market analysts and are not advised by either the author, nor Greynium Information Technologies or GoodReturns. The author, nor the brokerage firm nor GoodReturns would be liable for any losses caused as a result of decisions based on this write-up. Goodreturns.in advises users to consult with certified experts before making any investment decision.