IPO News: చరిత్ర సృష్టించిన ఐపీవోలు.. ఏకంగా రూ.1.5 లక్షల కోట్లు రైజ్..

IPO News 2024: ప్రస్తుతం భారతీయ స్టాక్ మార్కెట్లలో ఏం నడుస్తోంది అని పరిశీలిస్తే ఐపీవోల క్రేజ్ నడుస్తోందని డేటా చెబుతోంది. తినటానికైనా జనం ఖర్చుపెడుతున్నారో లేదో కానీ పెట్టుబడుల కోసం మాత్రం వేల కోట్లు కుమ్మరిస్తున్నారు. మరికొందరు మ్యూచువల్ ఫండ్లను కూడా తమ పెట్టుబడి అవసరాలను తీర్చటానికి సాధనంగా మార్చుకున్నారు.

2024లో ఇప్పటి వరకు దాదాపు 82 కంపెనీల ఐపీవోలు దేశీయ స్టాక్ మార్కెట్లోకి ఎంట్రీ ఇచ్చాయి. గడచిన దశాబ్ధకాలంలో ఇదే అత్యధిక సంఖ్య. పైగా వీటి ద్వారా దేశీయ స్టాక్ మార్కెట్ల నుంచి మెయిన్ బోర్డ్ కంపెనీ ఐపీవోలు దాదాపు లక్షన్నర కోట్ల రూపాయలను విజయవంతంగా సమీకరించాయి. పైగా చాలా కాలంగా ఇన్వెస్టర్లు ఆసక్తిగా ఎదురుచూసిన అనేక కంపెనీల ఐపీవోలు ఈ ఏడాది మార్కెట్లలోకి వచ్చాయి. దీనికి తోడు ఈ ఏడాది భారీగా ఎస్ఎమ్ఈ కేటగిరీలో సైతం ఐపీవోలు అరంగేట్రం చేశాయి.

ఇదే క్రమంలో గడచిన కాలంలో ఐపీవోల డేటా పరిశీలిస్తే.. 2023లో 57 ఐపీవో లిస్టింగ్స్ ద్వారా రూ.49,435 కోట్లు, 2022లో 40 ఐపీవోల ద్వారా రూ.59,301 కోట్లతో పోలిస్తే 2024లో ఐపీవోల ద్వారా భాపీ మెుత్తాన్ని కంపెనీలు తమ మూలధన అవసరాల కోసం సమీకరించాయి. 2024లో అత్యధికంగా 143 కంపెనీలు తమ డ్రాఫ్ట్ పేపర్లను సెబీ వద్ద దాఖలు చేశాయని వెల్లడైంది. ఇక్కడి వరకు అంతా బాగానే ఉన్నప్పటికీ 2025లో ఐపీవోల పరిస్థితి ఏంటి అనే ప్రశ్నలు తలెత్తుతూనే ఉన్నాయి. ఈ క్రమంలో జెప్టో, ఫ్లిప్ కార్ట్, ఇండిరా ఐవీఎఫ్, హెచ్డీఎఫ్సీ క్రెడిలా వంటి కంపెనీలు తమ అదృష్టాన్ని పరీక్షించుకోవటం కోసం మార్కెట్లోకి ఐపీవోలను తీసుకురానున్నాయని తెలుస్తోంది.

ఐపీవో డ్రాఫ్ట్ ఫైలింగ్‌లలో ఈ రికార్డ్ మార్కెట్ల అత్యుత్తమ పనితీరు వల్ల వచ్చాయి. 2024లో బెంచ్ మార్క్ సూచీలు సెన్సెక్స్, నిఫ్టీలు దాదాపు 13% పెరుగుదలను చూశాయి. 2023లో ఒక్కొక్కటి బలమైన 20% లాభాన్ని పొందాయి. ఇదే క్రమంలో ఐపీవో పైప్‌లైన్‌ పరిశీలిస్తే.. హెచ్‌డిబి ఫైనాన్షియల్ సర్వీసెస్ రూ.12,500 కోట్లు, ఎల్‌జీ ఎలక్ట్రానిక్స్ ఇండియా రూ.15,000 కోట్లు, ఎన్‌ఎస్‌డీఎల్ రూ.4,500 కోట్లు, డాక్టర్ అగర్వాల్స్ హెల్త్ కేర్ రూ.3,500 కోట్లు, హెక్సావేర్ టెక్నాలజీస్ రూ.9,500 కోట్లు, ఏథర్ ఎనర్జీ రూ.4,500 కోట్లు, జేఎస్డబ్ల్యూ సిమెంట్ రూ.4,000 కోట్లు, హీరో ఫిన్‌కార్ప్ రూ.3,600 కోట్లును సమీకరించే ప్లాన్ కలిగి ఉన్నాయి.