ప్రభుత్వం నుంచి రూ. 2,872 కోట్ల ఆర్డర్.. ఇన్వెస్టర్లు ఈ కంపెనీ స్టాక్స్ మీద ఓ కన్నేసి ఉంచండి..

KEC International Stock: ప్రముఖ ఆర్‌పిజి (RPG) గ్రూప్ సంస్థ, గ్లోబల్ ఇన్ఫ్రాస్ట్రక్చర్ ఈపీసీ దిగ్గజమైన కేఈసీ ఇంటర్నేషనల్ (KEC International) శుక్రవారం విపణిలో సరికొత్త మైలురాయిని నమోదు చేసింది. ప్రభుత్వ రంగానికి చెందిన పవర్ గ్రిడ్ కార్పొరేషన్ ఆఫ్ ఇండియా లిమిటెడ్ (PGCIL) నుండి కంపెనీ ఏకంగా రూ. 2,872 కోట్ల విలువైన మెగా ప్రాజెక్ట్ ఆర్డర్లను దక్కించుకుంది. భారతదేశంలో కేఈసీ ఇంటర్నేషనల్ పొందిన ట్రాన్స్‌మిషన్ అండ్ డిస్ట్రిబ్యూషన్ (T&D) వ్యాపార చరిత్రలోనే ఇది అతిపెద్ద ఏకైక ఆర్డర్ కావడం విశేషం.

ఈ ఒప్పందం కింద గుజరాత్‌లో 765 కేవీ (kV) ఎక్స్‌ట్రా హై-వోల్టేజ్ ట్రాన్స్‌మిషన్ లైన్లను డిజైన్ చేయడం, అవసరమైన పరికరాలు సరఫరా చేయడం, వాటి ఇన్‌స్టాలేషన్/స్థాపన బాధ్యతలను కేఈసీ ఇంటర్నేషనల్ నిర్వర్తిస్తుంది. గుజరాత్‌లోని ప్రధాన విద్యుత్ ఉత్పాదక కేంద్రాల నుండి జాతీయ పవర్ గ్రిడ్‌కు దాదాపు 8.5 గిగావాట్ల (GW) పునరుత్పాదక శక్తిని (గ్రీన్ ఎనర్జీ) సురక్షితంగా, వేగంగా తరలించడానికి ఈ మెగా ప్రాజెక్టును రూపొందించారు. దేశంలో పునరుత్పాదక ఇంధన సామర్థ్యాన్ని వేగంగా విస్తరిస్తున్న తరుణంలో, ఈ ప్రాజెక్ట్ గ్రీన్ ఎనర్జీ రవాణా మౌలిక సదుపాయాలను మరింత బలోపేతం చేయనుంది.

కేఈసీ ఇంటర్నేషనల్ మేనేజింగ్ డైరెక్టర్, సీఈఓ విమల్ కేజ్రీవాల్ మాట్లాడుతూ.. పీజీసీఐఎల్ నుండి లభించిన ఈ చారిత్రాత్మక ఆర్డర్ దేశీయ టీ&డీ విపణిలో తమ అగ్రగామి స్థానాన్ని పునరుద్ఘాటించిందని తెలిపారు. ఈ కొత్త ఆర్డర్‌తో ప్రస్తుత ఆర్థిక సంవత్సరంలో కంపెనీ పొందిన మొత్తం ఆర్డర్ల విలువ రూ. 13,500 కోట్లను దాటగా.. అందులో కేవలం టీ&డీ వ్యాపారం నుంచే రూ. 9,500 కోట్లకు పైగా ఆర్డర్లు రావడం గమనార్హం. దేశంలో పెరుగుతున్న విద్యుత్ డిమాండ్, గ్రిడ్ ఆధునీకరణపై ప్రభుత్వం ప్రాధాన్యత ఇస్తుండటంతో భవిష్యత్తులోనూ టీ&డీ మార్కెట్ అవకాశాలు అత్యంత ఉజ్వలంగా ఉంటాయని ఆయన ధీమా వ్యక్తం చేశారు.

Also Read

వచ్చే వారం మార్కెట్ మరింత పడిపోతుందా.. అమెరికా AI షేర్ల పతనంతో పెరుగుతున్న టెన్షన్..

శుక్రవారం నాటి ట్రేడింగ్‌లో కేఈసీ ఇంటర్నేషనల్ షేరు ధర విపణిలోని ఒత్తిడి కారణంగా ఎన్‌ఎస్‌ఈ (NSE)లో 1 శాతానికి పైగా క్షీణించి రూ. 327.75 వద్ద ముగిసింది. సెషన్ వ్యవధిలో ఒక దశలో రూ. 317.25 కనిష్ట స్థాయిని తాకినప్పటికీ.. ముగింపు సమయానికి కొంత కోలుకుంది. ప్రస్తుతానికి స్టాక్ ఇన్వెస్టర్లకు నిరాశనే మిగిల్చింది.

2026 ప్రారంభం నుండి ఇప్పటివరకు ఈ షేరు ఏకంగా 56 శాతం పడిపోగా, గడిచిన నెల రోజుల్లోనే 19 శాతం వరకు క్షీణించింది. శుక్రవారం నాటి ముగింపు ఆధారంగా కంపెనీ మార్కెట్ క్యాప్ రూ. 8,724 కోట్లుగా నమోదైంది. విశేషమేమిటంటే కంపెనీ పొందిన మొత్తం టీ&డీ విభాగానికి చెందిన ఆర్డర్ బుక్ పరిమాణం ఈ మార్కెట్ క్యాప్‌ను అధిగమించి ఇన్వెస్టర్లకు సుదీర్ఘకాల Revenue Visibility అందిస్తోంది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.