jio IPO: ఇన్వెస్టర్లకు పండగే.. గ్రే మార్కెట్‎లో ప్రీమియంలో ట్రేడవుతోన్న షేర్లు..!

ఎంతో ఆసక్తిగా ఎదురుచూస్తున్న జియో ప్లాట్‌ఫామ్స్ ఐపీఓ అక్టోబర్ 21 ప్రారంభం కానుంది. రిలయన్స్ ఇండస్ట్రీస్ డిజిటల్ అనుబంధ సంస్థ అయిన ఈ కంపెనీ బుధవారం నాడు అహ్మదాబాద్‌లోని గుజరాత్ కంపెనీల రిజిస్ట్రార్ వద్ద తన రెడ్ హెర్రింగ్ ప్రాస్పెక్టస్ (RHP)ను దాఖలు చేసింది. ఐపీఓ అక్టోబర్ 21 ప్రారంభం అయి అక్టోబర్ 23న ముగుస్తుంది. జియో ప్లాట్‌ఫామ్స్ ఐపీఓ ఒక్కో ఈక్విటీ షేరుకు రూ.1,065- రూ.1,119 మధ్య ఐపీఓ ధరల శ్రేణిని కూడా ప్రకటించింది. ఈ పబ్లిక్ ఇష్యూ ద్వారా కంపెనీ రూ.28,755 కోట్ల నుండి రూ.30,213 కోట్ల వరకు నిధులను సమీకరించే అవకాశం ఉంది. జియో ప్లాట్‌ఫామ్స్ ఐపీఓలో ఆఫర్-ఫర్-సేల్ (OFS) భాగం ఏమీ లేకుండా గరిష్టంగా 27 కోట్ల ఈక్విటీ షేర్ల పూర్తిగా ఫ్రెష్ ఇష్యూతో ఉంది.

ప్రస్తుత వాటాదారులు ఈ పబ్లిక్ ఇష్యూ ద్వారా తమ వాటాలలో దేనినీ విక్రయించరు. ముసాయిదా పత్రాల ప్రకారం ఈ షేర్లు అక్టోబర్ 28న స్టాక్ మార్కెట్‌లో అరంగేట్రం చేయనున్నాయి. వీటిని బీఎస్ఈ, ఎన్ఎస్ఈ రెండింటిలోనూ లిస్ట్ చేయాలని ప్రతిపాదించారు. ముసాయిదా పత్రాలలో ప్రతిపాదించిన సుమారు రూ.35,000 కోట్లతో పోలిస్తే సవరించిన ఇష్యూ పరిమాణం దాదాపు 14 శాతం తక్కువగా ఉంది. అయినప్పటికీ దేశంలోనే అతిపెద్ద పబ్లిక్ ఇష్యూగా ఈ ఐపీఓ నిలవనుంది. 2024లో హ్యుందాయ్ మోటార్ ఇండియా ఐపీఓ ద్వారా రూ.27,870 కోట్లను సేకరించింది. పెట్టుబడిదారులు కనీసం 12 షేర్ల కోసం బిడ్ చేయవచ్చు. ఒక్కో షేరు ముఖ విలువ రూ.10 ఉంటుంది.

ఉద్యోగుల రిజర్వేషన్ విభాగం కింద బిడ్ చేసే అర్హతగల ఉద్యోగులకు కంపెనీ ఒక్కో ఈక్విటీ షేరుపై రూ.54 తగ్గింపును కూడా అందించింది. వచ్చిన నిధులతో తన ప్రధాన అనుబంధ సంస్థ అయిన రిలయన్స్ జియో ఇన్ఫోకామ్ లిమిటెడ్ (RJIL) కొన్ని రుణాలను తిరిగి చెల్లించడానికి ఉపయోగించనున్నారు. జియో, కోటక్ మహీంద్రా క్యాపిటల్ కో., మోర్గాన్ స్టాన్లీ ఇండియా కో., బోఫా సెక్యూరిటీస్ ఇండియా లిమిటెడ్, యాక్సిస్ క్యాపిటల్ లిమిటెడ్, బీఎన్‌పీ పరిబాస్, సిటీగ్రూప్ గ్లోబల్ మార్కెట్స్ ఇండియా ప్రైవేట్ లిమిటెడ్ మరియు గోల్డ్‌మన్ సాక్స్ (ఇండియా) సెక్యూరిటీస్ తదితర సంస్థలను బుక్ రన్నింగ్ లీడ్ మేనేజర్లుగా నియమించింది.

ప్రస్తుతం జియో ప్లాట్‌ఫామ్స్‌లో రిలయన్స్ ఇండస్ట్రీస్ 66.43% వాటాను కలిగి ఉంది. మెటా ప్లాట్‌ఫామ్స్ తన అనుబంధ సంస్థ జాధు హోల్డింగ్స్ ఎల్ఎల్‌సి ద్వారా 9.98% వాటాను కలిగి ఉండగా, గూగుల్ ఇంటర్నేషనల్ ఎల్ఎల్‌సి 7.73% వాటాను కలిగి ఉంది. కేకేఆర్ & కో, విస్టా ఈక్విటీ పార్ట్‌నర్స్ మేనేజ్‌మెంట్ ఎల్ఎల్‌సి తమ సంబంధిత అనుబంధ ఫండ్‌ల ద్వారా జియో ప్లాట్‌ఫామ్స్‌లో చెరో 2.31% వాటాను కలిగి ఉన్నాయి. సిల్వర్ లేక్ 1.88% వాటాను కలిగి ఉండగా, దాని తర్వాత ముబడాలా ఇన్వెస్ట్‌మెంట్ కో 1.85% వాటాతో ఉంది. జనరల్ అట్లాంటిక్ 1.34 శాతమ, అబుదాబి ఇన్వెస్ట్‌మెంట్ అథారిటీ 1.16% వాటాలను కలిగి ఉన్నాయి. జియో ప్లాట్‌ఫామ్స్ ఐపీఓ జీఎంపీ ట్రెండ్‌లు బుల్లిష్‌గా కొనసాగుతున్నాయని మార్కెట్ పరిశీలకులు అంటున్నారు. ఇన్వెస్టర్‌గెయిన్ ప్రకారం, జియో ప్లాట్‌ఫామ్స్ ఐపీఓ షేర్లు గ్రే మార్కెట్‌లో రూ.206 జీఎంపీ వద్ద అందుబాటులో ఉన్నాయి. ఇది నిన్నటి రూ.218 జీఎంపీ కన్నా రూ.12 తక్కువ.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.