స్టాక్ మార్కెట్లో ఐటీసీ షేర్లు భారీగా పతనం.. రూ.1.41 లక్షల కోట్ల సంపద కోల్పోయిన పెట్టుబడిదారులు..

భారతీయ ఎఫ్‌ఎంసీజీ దిగ్గజం ఐటీసీ షేర్లు ప్రస్తుతం తీవ్రమైన 'బేర్ అటాక్'కు గురవుతున్నాయి. ఈ ఏడాది ఎఫ్‌ఎంసీజీ రంగం మొత్తం ఒత్తిడికి లోనవగా.. ITC షేర్లు ఏకంగా 21 శాతం మేర పతనమయ్యాయి. ఈ భారీ క్షీణత కారణంగా ఇన్వెస్టర్లు కేవలం ఈ ఏడాదిలోనే రూ. 1.41 లక్షల కోట్ల సంపదను కోల్పోయారు. 2025 నాటికి ఈ స్టాక్ నష్టాలు 12 శాతాన్ని మించిపోయాయి. ప్రస్తుతం వరుసగా నాలుగో రోజు కూడా ఈ షేరు రూ. 300 కీలక స్థాయి కంటే దిగువన ట్రేడ్ అవుతూ ఇన్వెస్టర్లను ఆందోళనకు గురిచేస్తోంది.

చార్టుల పరంగా చూస్తే, ఐటీసీ స్టాక్ ప్రస్తుతం 'ఓవర్‌సోల్డ్' స్థితిలో ఉంది. దీని రిలేటివ్ స్ట్రెంత్ ఇండెక్స్ (RSI) 30 మార్కు కంటే దిగువకు, అంటే 28.9కి పడిపోయింది. సాధారణంగా ఆర్‌ఎస్‌ఐ ఈ స్థాయిలో ఉంటే స్టాక్ ధరలు మరింత పడిపోయే అవకాశం తక్కువని.. కొనుగోళ్లు పెరిగే ఛాన్స్ ఉందని విశ్లేషకులు భావిస్తారు. అయినప్పటికీ, ప్రస్తుత సెషన్‌లో ఈ షేరు రూ. 288.75 వద్ద కొత్త 52 వారాల కనిష్ట స్థాయిని తాకింది. టెక్నికల్స్ పరంగా ఈ స్టాక్ తన స్వల్పకాలిక, దీర్ఘకాలిక మూవింగ్ యావరేజ్‌ల కంటే దిగువన ట్రేడ్ అవుతుండటం బలహీనతను సూచిస్తోంది. ప్రస్తుతం దీని మార్కెట్ క్యాప్ రూ. 3.63 లక్షల కోట్లుగా ఉంది.

2026లో చోటుచేసుకున్న ఈ దిద్దుబాటుకు ప్రధానంగా ప్రభుత్వ పన్ను విధానాలే కారణం. కాంపెన్సేషన్ సెస్ స్థానంలో జీఎస్టీని తీసుకురావడం మరియు 2026 ఫిబ్రవరిలో సిగరెట్లపై పరోక్ష పన్నులను భారీగా పెంచడంతో కంపెనీ లాభదాయకతపై ప్రభావం పడింది. దీనికి తోడు ముడిసరుకు ధరలు పెరగడం వల్ల ఎఫ్‌ఎంసీజీ విభాగంలో మార్జిన్లు తగ్గుతాయని అంచనా వేస్తున్నారు. దీర్ఘకాలికంగా చూసినా ఈ స్టాక్ పనితీరు నిరాశాజనకంగానే ఉంది. గత రెండేళ్లలో 28.61 శాతం, మూడేళ్లలో 19.23 శాతం మేర క్షీణించింది.

స్టాక్ మార్కెట్‌లో బ్లాక్ మండే.. భారీ నష్టాల్లో ట్రేడవుతున్న అన్ని రంగాలు.. ఇన్వెస్టర్లు విలవిల..

ఐటీసీ భవిష్యత్తుపై గ్లోబల్ బ్రోకరేజ్ సంస్థలు భిన్నాభిప్రాయాలు వ్యక్తం చేస్తున్నాయి. గోల్డ్ మన్ సాక్స్ ఈ స్టాక్‌పై 'న్యూట్రల్' వైఖరిని అవలంబిస్తూ.. తన పాత టార్గెట్ ధర రూ. 385ని రూ. 330కి తగ్గించింది. పన్నుల భారాన్ని వినియోగదారులపై మోపే క్రమంలో కంపెనీ ఆదాయ అంచనాల్లో కోత ఉంటుందని ఇది భావిస్తోంది. నాలుగో త్రైమాసికంలో ఆదాయాలు ఆశించిన స్థాయిలో ఉండకపోవచ్చని అంచనా వేసింది.

మరోవైపు, యూబీఎస్ (UBS) మాత్రం సానుకూలంగా స్పందించింది. ఇది ఐటీసీకి 'బై' కాల్ ఇస్తూ రూ. 395 ధర లక్ష్యాన్ని నిర్దేశించింది. వాల్యూమ్‌లను కాపాడటానికి కంపెనీ అనుసరిస్తున్న 'త్రివిధ ధరల వ్యూహం' సత్ఫలితాలను ఇస్తుందని, ఇది భవిష్యత్తులో బేరిష్ అంచనాలను అధిగమించి వృద్ధిని నమోదు చేస్తుందని యూబీఎస్ విశ్వసిస్తోంది. ప్రస్తుత ధరల వద్ద ఈ స్టాక్ విలువ చాలా ఆకర్షణీయంగా ఉందని ఈ బ్రోకరేజ్ సంస్థ అభిప్రాయపడింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.