Click it and Unblock the Notifications
IRDAI ఒక్క నిర్ణయంతో స్టాక్ మార్కెట్లో కల్లోలం.. భారీగా పతనమైన ఇన్సూరెన్స్ స్టాక్లు.. ఎంతలా అంటే..
Insurance Stocks Crash: భారతీయ భీమా రంగాన్ని మరింత పారదర్శకంగా మార్చడానికి, వినియోగదారుల ప్రయోజనాలను పరిరక్షించడమే లక్ష్యంగా భీమా నియంత్రణ, అభివృద్ధి ప్రాధికార సంస్థ (IRDAI) తీసుకున్న ఒక నిర్ణయం స్టాక్ మార్కెట్లో తీవ్ర సంచలనం సృష్టించింది.
పంపిణీ వ్యయాలను హేతుబద్ధీకరించడం, కమీషన్ నిర్మాణంలో సమూల మార్పులు తెచ్చేందుకు ఐఆర్డిఎఐ "రీకాలిబ్రేటింగ్ ఎకనామిక్స్ ఆఫ్ ఇన్సూరెన్స్ డిస్ట్రిబ్యూషన్" పేరుతో రెండు భాగాల సంప్రదింపుల పత్రాన్ని విడుదల చేసింది. ఈ కొత్త ప్రతిపాదనలు అమలులోకి వస్తే భీమా కంపెనీలు, డిజిటల్ బ్రోకరేజ్ సంస్థల ఆదాయాలపై తీవ్ర ప్రతికూల ప్రభావం పడుతుందనే ఆందోళనతో సెప్టెంబర్ 24, గురువారం నాటి ట్రేడింగ్లో భీమా సంబంధిత షేర్లు భారీగా పతనమయ్యాయి.
ఈ కొత్త సంప్రదింపుల పత్రంలో ఐఆర్డిఎఐ ప్రధానంగా కమీషన్లపై స్పష్టమైన పరిమితులను విధించాలని ప్రతిపాదించింది. ముఖ్యంగా తక్కువ కాలపరిమితి ఉన్న పాలసీలపై ఏజెంట్లు పొందే తొలి సంవత్సర కమీషన్ను గరిష్ఠంగా 6.25 శాతానికి, బ్రోకర్లు, కార్పొరేట్ ఏజెంట్ల కమీషన్ను 5 శాతానికి పరిమితం చేయాలని సూచించింది.
అదే సమయంలో, దీర్ఘకాలిక పాలసీలకు మొదటి సంవత్సరం కమీషన్లను గరిష్ఠంగా 20 నుండి 25 శాతంగా ప్రతిపాదిస్తూనే.. పాలసీదారులు మధ్యలోనే రద్దు చేసుకోకుండా నిరోధించేందుకు ఆరో సంవత్సరం నుంచి ప్రతి మూడేళ్లకు నిలకడైన బోనస్ కమీషన్లను ప్రతిపాదించింది. దీనికి అదనంగా, భీమా కంపెనీల నిర్వహణ వ్యయాల (EOM) పరిమితిని కంపెనీ స్థాయి జిడిపిఐ ఆధారంగా ఐదేళ్ల వ్యవధిలో జీవిత భీమా సంస్థలకు 12.5 శాతానికి, సాధారణ భీమా సంస్థలకు 20 శాతానికి తగ్గించాలని కఠిన నిబంధనలను విధించింది.
ఈ మార్పుల వల్ల డిజిటల్ ప్లాట్ఫారమ్లు, థర్డ్ పార్టీ బ్రోకర్ల ఆర్థిక మూలాలు దెబ్బతింటాయన్న విశ్లేషణలతో విపణిలో తీవ్ర అమ్మకాల ఒత్తిడి కనిపించింది. గురువారం నాటి ఐపిఓ, ట్రేడింగ్లో ఇన్సూరెన్స్ అగ్రిగేటర్ సంస్థ టర్టిల్మింట్ ఏకంగా 20 శాతం పడిపోయి 109.10 రూపాయలకు చేరగా, పిబి ఫిన్టెక్ (పాలసీబజార్) మరియు మ్యాక్స్ ఫైనాన్షియల్ షేర్లు దాదాపు 10 శాతం మేర నష్టపోయాయి. అలాగే ప్రముఖ జీవిత భీమా సంస్థలైన ఐసిఐసిఐ ప్రుడెన్షియల్ లైఫ్ 6.4 శాతం, హెచ్డిఎఫ్సి లైఫ్ 5 శాతం మేర పడిపోయాయి. పంపిణీ నమూనా మారడం వల్ల హెచ్డిఎఫ్సి బ్యాంక్, యాక్సిస్ బ్యాంక్ వంటి ప్రధాన బ్యాంకింగ్ భాగస్వామ్య సంస్థల ఫీజు ఆదాయంపై కూడా ప్రభావం పడవచ్చని విశ్లేషకులు భావిస్తున్నారు.
గ్లోబల్ బ్రోకరేజ్ సంస్థలు కూడా ఈ పరిణామాలపై స్పందించాయి. బెర్న్స్టీన్ నివేదిక ప్రకారం, ఐఆర్డిఎఐ ప్రతిపాదించిన కమీషన్ కోతలు అంచనాల కంటే చాలా కఠినంగా ఉన్నాయని, ఇది సమీప భవిష్యత్తులో పిబి ఫిన్టెక్ వంటి అగ్రిగేటర్ల లాభదాయకతపై తీవ్ర ఒత్తిడి తెస్తుందని పేర్కొంది. అయితే సొంత ఏజెంట్ నెట్వర్క్ బలంగా ఉన్న ఎల్ఐసి, ఎస్బిఐ లైఫ్ వంటి దిగ్గజాలపై ఈ ప్రభావం చాలా తక్కువగా ఉంటుందని జెఫరీస్ మరియు మాక్వారీ సంస్థలు విశ్లేషించాయి. మోటార్ ఇన్సూరెన్స్ కోసం 'భీమా సుగమ్' వంటి డిజిటల్ ప్లాట్ఫారమ్లను ప్రోత్సహించడం మరియు కస్టమర్లకు అందించే పాలసీ పత్రాల్లోనే ఏజెంట్ కమీషన్ వివరాలను పారదర్శకంగా వెల్లడించాలనే నిబంధనలు సుదీర్ఘ కాలంలో పరిశ్రమకు మంచివే అయినప్పటికీ, స్వల్పకాలంలో మాత్రం స్టాక్ మార్కెట్లో అస్థిరతకు దారితీస్తున్నాయి.
డిస్క్లైమర్: ఈ వెబ్సైట్లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్సైట్లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.
Sign in with Google
