Stock market: ఇన్వెస్టర్లకు బంపర్ ఆఫర్! కరోనా తర్వాత అతిపెద్ద కొనుగోలు అవకాశం ఇప్పుడేనా?

ప్రపంచ ఆర్థిక వ్యవస్థ ప్రస్తుతం ఒక రకమైన అనిశ్చితిని ఎదుర్కొంటోంది. ఒకవైపు భౌగోళిక రాజకీయ ఉద్రిక్తతలు, మరోవైపు ఇంధన ధరల పెరుగుదల అంతర్జాతీయ ఫైనాన్షియల్ మార్కెట్లను వణికిస్తున్నాయి. అయితే, ఇన్ని ఒడిదుడుకుల మధ్య కూడా భారత stock market ప్రపంచానికి ఒక 'సురక్షిత కేంద్రం' (Stable Core) లా కనిపిస్తోందని ప్రముఖ క్వాంట్ మ్యూచువల్ ఫండ్ (Quant Mutual Fund) తన తాజా నివేదికలో వెల్లడించింది. సందీప్ టాండన్ నేతృత్వంలోని ఈ ఫండ్ హౌస్, ప్రస్తుత మార్కెట్ పరిస్థితులపై ఆసక్తికరమైన విశ్లేషణను అందించింది.

అంతర్జాతీయ మార్కెట్ల పతనం.. ఇండియాపై ప్రభావం?

ఇరాన్‌పై అమెరికా , ఇజ్రాయెల్ జరిపిన సైనిక చర్యల కారణంగా గ్లోబల్ ఈక్విటీ మార్కెట్లలో భారీ కరెక్షన్ కనిపించింది. అమెరికాలోని ఎస్ అండ్ పి 500 (S&P 500), జపాన్ నిక్కీ 225, కొరియా కోస్పీ వంటి సూచీలు భారీగా నష్టపోయాయి. భయానికి కొలమానంగా భావించే విఐఎక్స్ (VIX) ఇండెక్స్ ఈ నెలలో ఏకంగా 75 శాతం పెరగడం మార్కెట్లలో ఉన్న ఆందోళనను తెలియజేస్తోంది. భారత నిఫ్టీ 50 కూడా ఈ ప్రకంపనలకు గురైనప్పటికీ, ఇది ఒక సాధారణ సర్దుబాటు ప్రక్రియ మాత్రమేనని నిపుణులు భావిస్తున్నారు.

ఇది ముగింపు కాదు.. ఒక కొత్త ఆరంభం!

దేశీయ మార్కెట్లలో కనిపిస్తున్న ఒత్తిడిని చూసి భయపడాల్సిన అవసరం లేదని క్వాంట్ మ్యూచువల్ ఫండ్ పేర్కొంది. భారత stock market లో అత్యంత కష్టతరమైన కరెక్షన్ దశ దాదాపు ముగిసిందని, ఇది ఒక ఇన్ఫ్లెక్షన్ పాయింట్ (మార్పుకు సంకేతం) అని వారు అభిప్రాయపడుతున్నారు. ప్రస్తుత అస్థిరత అనేది మార్కెట్ వైఫల్యం కాదు, సహజమైన సర్దుబాటు మాత్రమే. చైనా నామినల్ జిడిపి వృద్ధి రేటు కంటే భారత్ రెట్టింపు వేగంతో దూసుకుపోతుండటం, అంతర్జాతీయ ఇన్వెస్టర్లకు మన దేశం మొదటి ఛాయిస్‌గా మారడానికి ప్రధాన కారణం.

ఏ రంగాలు పుంజుకోనున్నాయి?

రాబోయే త్రైమాసికాల్లో కంపెనీల ఆదాయాలు మెరుగుపడతాయని అంచనా వేస్తూ, క్వాంట్ మ్యూచువల్ ఫండ్ తమ ఈక్విటీ పెట్టుబడులను పెంచింది. ముఖ్యంగా లార్జ్-క్యాప్ స్టాక్స్‌పై వారు ఎక్కువ మొగ్గు చూపుతున్నారు. ఎనర్జీ, ఇన్‌ఫ్రాస్ట్రక్చర్, ఎన్‌బిఎఫ్‌సి (NBFC), ఇన్సూరెన్స్, ప్రైవేట్ బ్యాంకులు, ఫార్మా , టెలికాం రంగాల్లో పాజిటివ్ ట్రెండ్ కనిపిస్తోందని వారు తెలిపారు. అలాగే ఎఫ్ఎమ్‌సిజి (FMCG), ఫుడ్ ప్రాసెసింగ్ వంటి కన్జంప్షన్ ఆధారిత షేర్లు కూడా లాభాలను ఇచ్చే అవకాశం ఉంది. అయితే, తయారీ రంగం (Manufacturing) పై మాత్రం ప్రస్తుతానికి కొంత దూరంగా ఉండటమే మంచిదని సూచించారు.

కొనుగోలు చేయడానికి ఇదే సరైన సమయమా?

మార్కెట్ నిపుణుల విశ్లేషణ ప్రకారం, కరోనా మహమ్మారి తర్వాత stock market లో పెట్టుబడి పెట్టడానికి దొరికిన అతిపెద్ద అవకాశాల్లో ఇదీ ఒకటి. మార్కెట్ సెంటిమెంట్ తీవ్రంగా పడిపోయినప్పుడు భయపడకుండా, సరైన షేర్లను ఎంచుకుని పోర్ట్‌ఫోలియోను రీబ్యాలెన్స్ చేసుకోవాలని వారు సూచిస్తున్నారు. దీర్ఘకాలిక లక్ష్యంతో పెట్టుబడి పెట్టే వారికి ప్రస్తుత కరెక్షన్ ఒక వరంగా మారవచ్చు. భారత స్థూల ఆర్థిక స్థిరత్వం , కొనసాగుతున్న సంస్కరణలు మన మార్కెట్‌ను ప్రపంచంలోనే అత్యుత్తమంగా నిలబెడుతున్నాయి. కాబట్టి, చిన్న చిన్న ఒడిదుడుకులకు భయపడకుండా క్రమశిక్షణతో పెట్టుబడులు కొనసాగించడం ఉత్తమం.