ఈ కంపెనీ షేర్ స్టాక్ మార్కెట్లో దుమ్ము రేపింది.. ఇన్వెస్టర్లకు డబ్బులే డబ్బులు.. కోటక్ నివేదికే కారణం..

గోద్రెజ్ గ్రూప్‌నకు చెందిన వ్యవసాయాధారిత దిగ్గజ సంస్థ గోద్రెజ్ ఆగ్రోవెట్ (Godrej Agrovet) షేర్లు మంగళవారం ట్రేడింగ్ సెషన్‌లో రికార్డు స్థాయి ప్రదర్శనతో మార్కెట్ దృష్టిని ఆకర్షించాయి. ప్రముఖ దిగ్గజ బ్రోకరేజ్ సంస్థ కోటక్ ఇన్‌స్టిట్యూషనల్ ఈక్విటీస్ (Kotak Institutional Equities) ఈ కంపెనీపై అత్యంత సానుకూల నివేదికను విడుదల చేస్తూ.. కొనుగోలు సిఫార్సును పునరుద్ఘాటించడమే ఈ భారీ ర్యాలీకి కారణమైంది. గత ముగింపు ధర రూ. 615తో పోలిస్తే.. మంగళవారం ట్రేడింగ్ సమయంలో కంపెనీ షేరు ఒక్కసారిగా 12 శాతం కంటే ఎక్కువ ఎగబాకి ఇంట్రాడే గరిష్ట స్థాయి రూ. 696ను తాకింది.

కోటక్ ఇన్‌స్టిట్యూషనల్ ఈక్విటీస్ గోద్రెజ్ ఆగ్రోవెట్‌పై తన 'బై' (BUY) రేటింగ్‌ను కొనసాగిస్తూ.. దాని టార్గెట్ ధరను గతంలో ఉన్న రూ. 850 నుంచి రూ. 1,010కి భారీగా పెంచింది. సెప్టెంబర్ 1న విడుదల చేసిన ఈ నివేదిక ప్రకారం.. ప్రాథమిక ముగింపు ధర రూ. 615 ఆధారంగా చూస్తే ఈ నూతన టార్గెట్ ఇన్వెస్టర్లకు ఏకంగా 64.22 శాతం వరకు బలమైన లాభాలను అందించే అవకాశం ఉందని బ్రోకరేజ్ అంచనా వేసింది. ఇంట్రాడే గరిష్ట ధర రూ. 696 వద్ద కొనుగోలు చేసినప్పటికీ.. భవిష్యత్తులో ఈ షేరు నుండి 45 శాతానికి పైగా ఆకర్షణీయమైన రాబడి లభించవచ్చని పేర్కొంది.

కంపెనీ వ్యాపార నమూనాను విశ్లేషించిన కోటక్, గోద్రెజ్ ఆగ్రోవెట్ యొక్క పామాయిల్ (Oil Palm) విభాగాన్ని అత్యంత విలువైన వ్యాపారంగా అభివర్ణించింది. ఆర్థిక సంవత్సరం 2026లో రూ. 430 కోట్ల EBITDA నమోదు చేసిన ఈ విభాగం, FY2031 నాటికి రూ. 1,000 కోట్లకు పైగా EBITDA సాధించే సామర్థ్యాన్ని కలిగి ఉందని నివేదిక వెల్లడించింది. పామాయిల్ శుద్ధి, తోటల రంగంలో కంపెనీ పొందుతున్న ప్రాంతీయ ఆధిపత్యం స్థానిక ఏకస్వామ్యానికి (Local Monopoly) దారితీసిందని, దీనివల్ల EBITDA మల్టిపుల్‌ను 15x నుండి 18xకి పెంచుతున్నట్లు తెలిపింది.

Also Read

లాభాల్లో మెరిసిన స్టాక్ మార్కెట్.. వరుస నష్టాల తర్వాత పుంజుకున్న సూచీలు

కేవలం పామాయిల్ వ్యాపార విభాగానికి ఇచ్చే విలువే కంపెనీ ప్రస్తుత మొత్తం మార్కెట్ క్యాపిటలైజేషన్ (సుమారు రూ. 12,872 కోట్లు) కంటే ఎక్కువగా ఉండే అవకాశం ఉందని కోటక్ విశ్లేషించింది. దీనికి తోడు కంపెనీ పశువుల దాణా, పంట సంరక్షణ, డైరీ మరియు పౌల్ట్రీ రంగాలు కలిపి FY2031 నాటికి రూ. 4,500 కోట్ల ఆదాయాన్ని, 23 శాతానికి మించిన మార్జిన్లను సాధించవచ్చని అంచనా వేసింది. కంపెనీ దీర్ఘకాలిక వృద్ధి కనీసం 2040 సంవత్సరం వరకు బలంగా కొనసాగుతుందని బ్రోకరేజ్ ధీమా వ్యక్తం చేసింది.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.