గ్లోబల్ టెక్ షేర్లలో కల్లోలం.. ఒకే ఒక్క వార్తతో రూ. 159.8 లక్షల కోట్లు హాంఫట్.. భారత ఐటీ రంగం విలవిల..

Global Tech Stocks Crash: నవంబర్ 12వ తేదీ ఉదయం ఎంతో సాధారణంగా, సానుకూలంగా ప్రారంభమైన ప్రపంచ స్టాక్ మార్కెట్లు మధ్యాహ్నం సమయానికి ఒక్కసారిగా కుదేలయ్యాయి. అంతర్జాతీయ సానుకూల సంకేతాలకు అనుగుణంగా భారత స్టాక్ మార్కెట్ సైతం ఆరంభ క్షీణత నుండి కోలుకుని రోజువారీ గరిష్ఠ స్థాయికి చేరుకుంది. అయితే అమెరికా నుండి వెలువడిన రెండు ప్రధాన పరిణామాలు ప్రపంచవ్యాప్తంగా టెక్ రంగంలో పెను ప్రకంపనలు సృష్టించడంతో పాటు ఈక్విటీ మార్కెట్లను భారీ నష్టాల్లోకి నెట్టాయి.

ఈ ఆకస్మిక పతనంతో ప్రపంచ స్టాక్ మార్కెట్లు సుమారు 1.7 ట్రిలియన్ డాలర్లు.. అంటే దాదాపు రూ. 159.8 లక్షల కోట్ల మదుపర్ల సంపదను ఆవిరి చేశాయి. దీని ప్రభావంతో భారతదేశంలోని ఎన్ఎస్ఈ నిఫ్టీ సూచీ కూడా తన ఇంట్రాడే గరిష్ఠ స్థాయి నుండి సుమారు 240 పాయింట్లు పడిపోయింది, అయితే దేశీయ బ్యాంకింగ్ స్టాక్స్ అండగా నిలవడంతో మరింత భారీ పతనం తప్పింది.

ఈ ప్రపంచవ్యాప్త మార్కెట్ అలజడికి ప్రధాన కారణం అమెరికన్ ఏఐ చిప్ తయారీ దిగ్గజం ఎన్విడియా చుట్టూ అలుముకున్న సంక్షోభం అని చెప్పవచ్చు. ఎన్విడియా సీఈఓ జెన్సన్ హువాంగ్‌ను పదవి నుండి తొలగించేందుకు కంపెనీ బోర్డు సిద్ధమవుతోందంటూ వాల్ స్ట్రీట్ జర్నల్ ప్రచురించిన సంచలన కథనం పెట్టుబడిదారులను తీవ్ర దిగ్భ్రాంతికి గురిచేసింది.

కృత్రిమ మేధస్సు (AI), డేటా సెంటర్ల చిప్‌ల విభాగంలో తిరుగులేని ఆధిపత్యం చెలాయిస్తున్న ఎన్విడియాపై ఈ వార్త పిడుగుపాటులా మారడంతో.. యూఎస్ ఎక్స్‌టెండెడ్ ట్రేడింగ్‌లో ఆ కంపెనీ షేర్లు 8 శాతానికి పైగా కుప్పకూలాయి. గత కొద్ది రోజులుగా ఏఐ స్టాక్స్‌లో కనిపించిన భారీ ర్యాలీకి ఇది అడ్డుకట్ట వేసింది. మరోవైపు ఏఐ కంపెనీల భారీ ఖర్చులు, ప్రభుత్వ నియంత్రణల డిమాండ్లు, భవిష్యత్ రాబడులపై నిపుణులు వ్యక్తం చేస్తున్న ఆందోళనలు టెక్ షేర్లలో అమ్మకాల వెల్లువను మరింత పెంచాయి.

Also Read

స్టాక్ మార్కెట్ టుడే.. లాభాలన్నీ ఆవిరి.. ఫ్లాట్‌గా సెన్సెక్స్, నిఫ్టీ.. కారణం ఏంటంటే..

ఎన్విడియా సంక్షోభంతో పాటు అమెరికా ద్రవ్యోల్బణ గణాంకాలు కూడా మార్కెట్ సెంటిమెంట్‌ను దెబ్బతీశాయి. అక్టోబర్ నెలలో ద్రవ్యోల్బణం అంచనాలకు మించి నమోదవడంతో.. డిసెంబర్ సమావేశంలో యూఎస్ ఫెడరల్ రిజర్వ్ వడ్డీ రేట్లను అర శాతం మేర పెంచే అవకాశం ఉందని బ్యాంక్ ఆఫ్ అమెరికా (BofA) అంచనా వేసింది. వెల్స్ ఫార్గో ఇన్వెస్ట్‌మెంట్ ఇన్‌స్టిట్యూట్ విభాగాధిపతి సమీర్ సమనా సైతం ఏఐ పట్ల ఉన్న ఉత్సాహం కంటే అధిక ద్రవ్యోల్బణం, వడ్డీ రేట్ల పెరుగుదల మరియు నియంత్రణల వల్ల కలిగే నష్టభయమే ఎక్కువగా ఉందని హెచ్చరించారు.

ఈ పరిణామాల ఫలితంగా టెక్ కంపెనీల వెయిటేజ్ అధికంగా ఉండే నాస్‌డాక్ 100 ఫ్యూచర్స్ 0.97 శాతం, ఎస్&పి 500 ఫ్యూచర్స్ 0.37 శాతం క్షీణించాయి. దీని తక్షణ ప్రభావం ఆసియా మార్కెట్లపై స్పష్టంగా కనిపించింది. ఎన్విడియాకు చిప్‌లు సరఫరా చేసే శాంసంగ్, ఎస్కే హైనిక్స్ షేర్లు కుప్పకూలడంతో దక్షిణ కొరియా కోస్పి సూచీ 1.26 శాతం నష్టపోయింది. జపాన్ నిక్కీ 225 మరియు హాంకాంగ్ హాంగ్ సెంగ్ సూచీలు 0.82 శాతం చొప్పున పడిపోగా, చైనా సీఎస్ఐ 300 సూచీ 0.19 శాతం, ఆస్ట్రేలియా ఏఎస్ఎక్స్ 200 సూచీ 0.07 శాతం తగ్గాయి. ఇదే క్రమంలో భారతీయ ఐటీ కంపెనీల షేర్లు కూడా తీవ్ర అమ్మకాల ఒత్తిడికి గురై నిఫ్టీని గరిష్ఠాల నుండి కిందకు లాగాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.