Bull Market: నేడు 1280 పాయింట్లు పెరిగి సెన్సెక్స్ దూకుడు.. బుల్స్ పరుగుతో రూ.3 లక్షల కోట్లు లాభం..

Sensex-Nifty: కోటి ఆశలతో కొత్త ఏడాదిని ప్రారంభించిన భారతీయ స్టాక్ మార్కెట్ ఇన్వెస్టర్లకు మంచి కాలం మెుదలైంది. గడచిన నెలలో భారీ ఒడిదొడుకులతో కరెక్షన్ ఫేజ్ కొనసాగించిన మార్కెట్ సూచీలు నేడు బుల్స్ జోరుతో దౌడుతీస్తున్నాయి. ఇంట్రాడేలో బెంచ్ మార్క్ సూచీలు సెన్సెక్స్, నిఫ్టీలు పెట్టుబడిదారుల సంపదను పెంచుతున్నాయి.

నేడు వాస్తవానికి ఆసియా మార్కెట్లు తమ ప్రయాణాన్ని పతనంలో కొనసాగిస్తున్నప్పటికీ దీనికి వ్యతిరేకంగా భారతీయ స్టాక్ మార్కెట్లు భారీ ర్యాలీతో ముందుకు సాగుతున్నాయి. ప్రధానంగా నేడు ఇంట్రాడేలో ఫైనాన్షియల్, ఆటో, ఐటీ రంగాలకు చెందిన కంపెనీల షేర్లలో కొనసాగిన కొనుగోళ్లు మార్కెట్ల పరుగుకు ఆజ్యం పోశాయి. రానున్న వారంలో కంపెనీలు తమ క్యూ3 కార్పొరేట్ ఫలితాలను ప్రకటించనున్న వేళ సానుకూల ఫలితాలను ఆశిస్తున్న క్రమంలో ఇన్వెస్టర్లు తమ కొనుగోళ్లను కొనసాగిస్తున్నట్లు వెల్లడైంది. ఈ క్రమంలో నేడు ఇంట్రాడేలో బెంచ్ మార్క్ సూచీ సెన్సెక్స్ 1280 పాయింట్లు పెరగగా, నిఫ్టీ సూచీ 370 పాయింట్లకు పైగా లాభపడింది.

నేడు స్టాక్ మార్కెట్లో బుల్స్ విజృంభించటంతో ఇన్వెస్టర్ల పెట్టుబడి విలువ బీఎస్ఈలో దాదాపు రూ.2.92 కోట్ల మేర పెరుగుదలను చూసింది.స్టాక్ మార్కెట్లు పెరుగుదలకు ప్రధాన కారణాలు ఇవే..
-దేశీయంగా జీఎస్టీ వసూళ్లలో ఆరోగ్యకరమైన పెరుగుదల ఈక్విటీ ఇన్వెస్టర్లను సానుకూలంగా నడిపిస్తోంది. ఇవి ఏడాది ప్రాతిపదికన 7.3 శాతం పెరిగి రూ.1.77 లక్షల కోట్లుగా నమోదు కావటమేనని నిపుణులు చెబుతున్నారు. ఇవి పెట్టుబడిదారుల సెంటిమెంట్లను బలపరిచాయని అన్నారు.

- టెక్నికల్స్ పరిశీలిస్తే బెంచ్ మార్క్ సూచీ నిఫ్టీ తాజాగా 200 మూవింగ్ ఏవరేజ్ దాటండం కూడా ఇన్వెస్టర్లను ర్యాలీలో పాల్గొనేలా చేసిందని వెల్లడైంది.

- త్వరలోనే కంపెనీలు తమ మూడవ త్రైమాసికానికి సంబంధించిన రిపోర్ట్స్ విడుదల చేయనున్న వేళ స్టాక్ మార్కెట్లు సానుకూలంగా ప్రభావితం అవుతున్నాయని పెట్టుబడిదారులు చెబుతున్నారు. ఆభరణాలు, ఏవియేషన్ హాస్పిటాలిటీ వంటి లగ్జరీ వినియోగ రంగాలు బలమైన రాబడులను అందజేస్తాయని ఆశిస్తున్నట్లు జియోజిత్ ఫైనాన్షియల్ సర్వీసెస్ చీఫ్ ఇన్వెస్ట్‌మెంట్ స్ట్రాటజిస్ట్ వికె విజయకుమార్ పేర్కొన్నారు.

- ప్రముఖ రేటింగ్ సంస్థలు సిటీ గ్రూప్, సీఎల్ఎస్ఏ ఐటీ పరిశ్రమపై తమ అభిప్రాయాలను వెల్లడించాయి. ఈ సారి ఐటీ సంస్థలోని కంపెనీలు ఆదాయాలు మంచిగా వృద్ధి చెందుతాయని, డాలర్ రూపాయి మారకపు విలువ పతనం అనుకూలంగా మారుతుందని వారు భావిస్తున్నారు.