AI డేంజర్ బెల్స్.. కుప్పకూలిన భారత ఐటీ కంపెనీల షేర్లు.. నిమిషాల వ్యవధిలో రూ. 2 లక్షల కోట్లు ఆవిరి..

స్టాక్ మార్కెట్లో ఈ రోజు ఐటీ షేర్లు కుప్పకూలాయి. AI రాకతో ఐటీ షేర్లు పుంజుకుంటాయనే ఆశలపై నీళ్లు చల్లుతూ ఈ రోజు ఐటీ మార్కెట్ అంతా గందరగోళంగా తయారైంది. స్టాక్ మార్కెట్ ప్రారంభమైన కొద్ది క్షణాల్లోనే ఐటీ షేర్లు రెడ్ మార్కుతో ట్రేడ్ అయ్యాయి. దీనికి కారణం ఏంటంటే.. ఆంత్రోపిక్ తన చట్టబద్ధమైన (లీగల్-ఫోకస్‌డ్) AI సాధనాన్ని ఈ రోజు (ఫిబ్రవరి 4) ప్రారంభించడమేనని చెప్పవచ్చు.ఈ నేపథ్యంలోనే గ్లోబల్ టెక్నాలజీ రంగంలో పెరుగుతున్న పోటీపై ఆందోళనలు మళ్లీ తెరపైకి వచ్చాయి.

ఈ ప్రభావం ఒక్కసారిగా భారతీయ ఐటీ రంగంపై పడింది. పెట్టుబడిదారులు నిర్మాణాత్మక అంతరాయం (structural disruption) భయంతో అమ్మకాలకు దిగడంతో, భారత ఐటీ కంపెనీల షేర్లు ఒక్కరోజులో భారీగా కుప్పకూలాయి. వాల్ స్ట్రీట్‌లో టెక్ స్టాక్స్ అమ్మకాలు పెరగడంతో.. గ్లోబల్ మార్కెట్లలో నెగటివ్ సెంటిమెంట్ ఏర్పడింది. దీనికి ప్రతిఫలంగా నిఫ్టీ ఐటీ ఇండెక్స్ 7 శాతానికి పైగా పడిపోయింది.

ఇది మార్చి 2020 తర్వాత అత్యంత చెత్త రోజుగా నమోదైంది. ఇన్ఫోసిస్, ఎల్‌టిఐ మైండ్‌ట్రీ షేర్లు ఒక్కొక్కటి 8 శాతానికి పైగా పతనమయ్యాయి. కోఫోర్జ్ షేర్లు దాదాపు 8 శాతం తగ్గగా, పెర్సిస్టెంట్ సిస్టమ్స్, ఎంఫసిస్, టీసీఎస్ షేర్లు సుమారు 7 శాతం పడిపోయాయి. టెక్ మహీంద్రా, హెచ్‌సీఎల్ టెక్నాలజీస్ షేర్లు దాదాపు 6 శాతం తగ్గగా.. విప్రో షేర్లు సుమారు 5 శాతం తగ్గాయి. ఈ అమ్మకాల కారణంగా అగ్రశ్రేణి భారత ఐటీ కంపెనీల మార్కెట్ క్యాపిటలైజేషన్ నుంచి దాదాపు రూ.2 లక్షల కోట్లు ఆవిరయ్యాయి.

జియోజిత్ ఇన్వెస్ట్‌మెంట్స్ లిమిటెడ్ చీఫ్ ఇన్వెస్ట్‌మెంట్ స్ట్రాటజిస్ట్ వికె విజయకుమార్ ప్రకారం.. అమెరికా-భారత్ వాణిజ్య ఒప్పందం కారణంగా వచ్చిన ర్యాలీకి ఇప్పుడు అడ్డంకులు ఎదురవుతున్నాయి. అమెరికాలో జరిగిన ఐటీ అమ్మకాలు భారత మార్కెట్‌పై ప్రభావం చూపాయని.. అధిక వాల్యుయేషన్లు ఉన్న నేపథ్యంలో స్థిరమైన ర్యాలీకి బలమైన ప్రాథమిక మద్దతు కనిపించడం లేదని ఆయన అన్నారు.

ఆంత్రోపిక్ తన క్లాడ్ AI చాట్‌బాట్ కోసం లీగల్ టూల్స్‌ను ప్రవేశపెట్టడం ఈ అమ్మకాలకు ప్రధాన కారణంగా మారింది. గత వారం క్లాడ్ కోవర్క్ ఏజెంట్‌కు సంబంధించిన ప్లగ్-ఇన్‌లను ప్రారంభించిన ఆంత్రోపిక్.. లీగల్, సేల్స్, మార్కెటింగ్, డేటా అనలిటిక్స్ వంటి విభాగాల్లో పనులను ఆటోమేట్ చేసే సామర్థ్యాన్ని పెంచింది. ఇది ఒకప్పుడు AI యుగం వల్ల లాభపడతాయని భావించిన ప్రొఫెషనల్ సర్వీసెస్, IT సేవల రంగాలకు కొత్త ముప్పుగా మారుతుందనే భయాలను రేకెత్తించింది.

ఆంత్రోపిక్ లీగల్ రంగంలో కొత్త సామర్థ్యాలను తీసుకురావడం వల్ల పోటీ మరింత తీవ్రమవుతుందని మోర్గాన్ స్టాన్లీ విశ్లేషకులు హెచ్చరించారు. ఇది డేటా, ప్రొఫెషనల్ సర్వీసెస్ పరిశ్రమకు ప్రతికూల సంకేతంగా మారవచ్చని వారు అభిప్రాయపడ్డారు.

INVasset PMS బిజినెస్ హెడ్ భావిక్ జోషి ప్రకారం.. ఈ పతనాన్ని కేవలం చక్రీయ బలహీనతగా కాకుండా నిర్మాణాత్మక అంతరాయం కోణంలో చూడాలి. AI ఇకపై కేవలం సేవలను మెరుగుపరచడం మాత్రమే కాకుండా, సంప్రదాయంగా మానవ శ్రమపై ఆధారపడిన వర్క్‌ఫ్లోలను భర్తీ చేయడం ప్రారంభించిందని ఆయన అన్నారు. SAP మైగ్రేషన్లు, ఎంటర్‌ప్రైజ్ ట్రాన్స్‌ఫార్మేషన్ వంటి క్లిష్టమైన పనులను AI ఆధారిత వ్యవస్థలు వేగంగా పూర్తి చేయగలగడం వల్ల.. లీనియర్ హెడ్‌కౌంట్ వృద్ధిపై ఆధారపడిన సేవా-మోడళ్లపై ఒత్తిడి పెరిగే అవకాశముందని ఆయన వివరించారు.

అయితే ఈ AI ముప్పులో ఒక సిల్వర్ లైనింగ్ కూడా ఉందని విశ్లేషకులు చెబుతున్నారు. స్థూల ఆర్థిక అనిశ్చితి సమయంలో సంస్థలు వేగం, స్కేలబిలిటీ, ఖర్చు నియంత్రణ అందించే AI ప్లాట్‌ఫారమ్‌ల వైపు మొగ్గుచూపుతాయని జోషి అభిప్రాయపడ్డారు. మార్కెట్లు ప్రస్తుతం స్వల్పకాలిక ఆదాయాలపై దృష్టి పెడుతున్నప్పటికీ, సంస్థలు దీర్ఘకాలిక ఆపరేషనల్ స్థిరత్వంపై పెట్టుబడులు పెడుతున్నాయని ఆయన అన్నారు.

విభావంగల్ అనుకూలకర వ్యవస్థాపకుడు సిద్ధార్థ్ మౌర్య ప్రకారం.. భారత ఐటీ స్టాక్స్‌లోని అమ్మకాలు ఎక్కువగా సెంటిమెంట్ ఆధారితమైనవే. ఫండమెంటల్స్‌లో అకస్మాత్తుగా పెద్ద మార్పు కనిపించడం లేదని, స్వల్పకాలంలో AI ముప్పును మార్కెట్లు అతిగా అంచనా వేస్తున్నాయని ఆయన అన్నారు. మధ్యకాలంలో AI సామర్థ్యాలను వేగంగా స్వీకరించే ఐటీ కంపెనీలు ముందంజలో నిలుస్తాయని, మిగతావి వెనుకబడిపోతాయని విశ్లేషకులు అభిప్రాయపడుతున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.