Mutual Funds: మ్యూచువల్ ఫండ్స్‌ ఇన్వెస్ట్‌మెంట్‌పై అపోహలు.. కనీస పెట్టుబడి ఎంతంటే..

Minimum investment: ఆదాయంతో సంబంధం లేకుండా పెట్టుబడులు పెట్టి భారీ కార్పస్ సృష్టించే అవకాశాన్ని మ్యూచువల్ ఫండ్స్ కల్పిస్తున్నాయి. ప్రతినెలా SIP చేస్తూ పెద్దమొత్తంలో రిటర్న్స్ జనరేట్ చేయవచ్చు. ఈ తరహా సౌలభ్యాలు ఉండటంతో ఇన్వెస్టర్లు వీటిలో పెట్టుబడులు పెట్టేందుకు ఎగబడుతున్నారు. అయితే మ్యూచువల్ ఫండ్స్‌లో కనీసం ఎంత ఇన్వెస్ట్‌ చేయాలనే విషయంపై చాలా మందికి అపోహలు ఉన్నాయి.

మ్యూచువల్ ఫండ్స్‌లో కనీస పెట్టుబడి అనేది ఆయా ఫండ్ రకం, ఇన్వెస్ట్‌మెంట్ ప్లాట్‌ఫారమ్, పెట్టుబడి విధానం సహా అనేక అంశాలపై ఆధారపడి ఉంటుంది. నెట్టింట వివిధ SIP కాలిక్యులేటర్స్ విరివిగా లభిస్తాయి. వాటితో ఇన్వెస్ట్‌మెంట్, రిస్క్‌ మరియు రిటర్నులను లెక్కించి ఓ అంచనాకు వచ్చిన తర్వాత ఇన్వెస్ట్‌ చేయడం ఉత్తమం అని నిపుణులు సూచిస్తున్నారు.

అవసరాలకు అనుగుణంగా మార్కెట్లో వివిధ మ్యూచువల్ ఫండ్స్‌ అందుబాటులో ఉన్నాయి. స్టాక్‌లు, బాండ్‌లు లేదా ఇతర సెక్యూరిటీలతో కూడిన విభిన్న పోర్ట్‌ఫోలియోలో పెట్టుబడి పెట్టడానికి ఇన్వెస్టర్లు ఆసక్తి చూపిస్తుంటారు. ఒకేసారి పెట్టుబడి పెట్టేందుకు సాధారణంగా ఈక్విటీ ఫండ్స్‌లో 500 నుంచి 5 వేల వరకు కనీస పెట్టుబడిగా ఉంటుంది. ఇక డెట్ మరియు హైబ్రిడ్ ఫండ్స్‌లో ఈ మొత్తం దాదాపు వెయ్యి నుంచి ప్రారంభం అవుతుంది.

ప్రతినెలా క్రమబద్ధంగా పెట్టుబడి పెట్టే SIPలో అత్యంత తక్కువ మొత్తంతో ఇన్వెస్ట్‌మెంట్ ప్రయాణం ప్రారంభించవచ్చు. కనీసం 100తో కూడా పెట్టుబడి పెట్టేందుకు పలు ఫండ్స్ అవకాశం కల్పిస్తున్నాయి. అయితే తర్వాత కాలంలో ఆదాయానికి అనుగుణంగా ఈ మొత్తాన్ని పెంచుకుంటూ పోతే కాంపౌండింగ్ బెనిఫిట్స్ పొందవచ్చు. ఇవి నేరుగా మార్కెట్‌తో లింక్ కాబడి ఉండటం వల్ల హెచ్చుతగ్గులు సహజం. కాబట్టి వీటిలో ఇన్వెస్ట్‌ చేసేముందు ఆర్థిక నిపుణుల సలహా తీసుకోవడం ఉత్తమం.