Credit Card: స్టాక్ మార్కెట్లో పెట్టుబడికి క్రెడిట్ కార్డు వాడండిలా.. తెలివైన వినియోగం..

Investment News: భారతదేశంలో క్రెడిట్ కార్డుల వినియోగం భారీగా పెరిగింది. ప్రస్తుతం కార్డుల వినియోగం ప్రమాదకర స్థాయిలకు చేరుకుంటుందని నిపుణులు సైతం హెచ్చరించిన సంగతి తెలిసిందే. సాధరణంగా షాపింగ్, కిరాణా కొనుగోళ్లు, గృహోపకరణాల కొనుగోళ్లకు ప్రధానంగా క్రెడిట్ కార్డులను భారతీయులు ఉపయోగిస్తుంటారు. వీటిని ఎక్కువగా క్యాష్ బ్యాక్స్, రివార్డ్స్, ఈఎంఐ ఎంపికల కోసం ఉపయోగిస్తుండటం మనకు సాధారణంగా తెలిసిందే.

క్రెడిట్ కార్డులు సాధారణంగా 40 రోజులు క్రెడిట్ సైకిల్ కలిగి ఉంటాయి. ఈ కాలంలో యూజర్లు తమకు అవసరమైన వస్తువులను ధరలు చూడకుండా కార్డు సహాయంతో ఆన్‌లైన్ లేదా ఆఫ్‌లైన్ స్టోర్లలో కొనుగోలు చేయటం మనం గమనిస్తూనే ఉన్నాం. అయితే ఈ ఆర్థిక సాధనాన్ని పెట్టుబడి కోసం ఉపయోగించవచ్చనే విషయం మనలో చాలా మందికి అస్సలు తెలియదు. అయితే పెట్టుబడులకు దీనిని సద్వినియోగం చేసుకోవటం వల్ల కార్డు ద్వారా అదనపు ఆదాయాన్ని, సంపదను సృష్టించుకోవటానికి వెసులుబాటు ఉంటుంది.

ఉదాహరణకు మార్కెట్లో ఆకర్షనీయమైన వాల్యుయేషన్ ఉన్న షేర్లను గమనించినప్పుడు దానిలో ఇన్వెస్ట్ చేయాలని చాలా మందికి అనిపిస్తుంటుంది. అయితే ఈ క్రమంలో తమ వద్ద లిక్విడిటీ తక్కువగా ఉండటంతో చాలా మంది ఇబ్బంది పడుతుంటారు. దీనిని అధిగమించటానికి క్రెడిట్ కార్డును వినియోగించవచ్చు లేదా సదరు మెుత్తాన్ని కార్డుపై రుణంగా పొందవచ్చు. అప్పు చేసి డబ్బును పెట్టుబడిగా పెట్టడం సరైనది కానప్పటికీ కొన్ని సందర్భాల్లో మాత్రం ఆచరణీయమైన ఎంపికగా అన్వేషించవచ్చు.

పెట్టుబడి పెట్టడం కోసం క్రెడిట్ కార్డ్‌ని ఉపయోగించడానికి ఉన్న కొన్ని కీలక మార్గాలను పరిశీలిస్తే..

స్వల్పకాలిక ఫైనాన్సింగ్: సమీప భవిష్యత్తులో స్టాక్ పెరుగుతుందని మీకు ఖచ్చితంగా తెలిస్తే.. దీని నుంచి మంచి రాబడిని మిస్ కాకూడదు అనుకున్నప్పుడు మీరు పెట్టుబడి ప్రయోజనం కోసం క్రెడిట్ కార్డ్‌ని ఉపయోగించవచ్చు. అయితే ఇది ప్రమాదకరమైన ఎంపిక ఎందుకంటే ఇన్వెస్టర్ అంచనాలు తప్పితే నష్టాలతో పాటు ఫైనాన్స్ క్రంచ్ లిక్విడిటీ సమస్యలను కలిగించే ప్రమాదం ఉంది.

అధిక నిల్వలను నివారించడం: మీరు పెట్టుబడి కోసం క్రెడిట్‌ని ఉపయోగించాలని ఎంచుకుంటే సకాలంలో మెుత్తం బిల్లు చెల్లించటానికి డబ్బు ఉండేలా చూసుకోవటం ఉత్తమం. లేకపోతే లేటు పేమెంట్ల వల్ల కట్టాల్సి వచ్చే వడ్డీల భారం స్టాక్ పెట్టుబడుల నుంచి వచ్చిన లాభాలను ఆవిరి చేస్తుంది.

నగదు అడ్వాన్స్: మీరు క్రెడిట్ కార్డ్ నుండి నగదు అడ్వాన్స్ కూడా తీసుకోవచ్చు. పెట్టుబడి కోసం డబ్బును ఉపయోగించవచ్చు. ఇది సాధారణంగా అధిక రుసుములు, వడ్డీ రేట్లతో వచ్చి ఖరీదైన ఎంపికగా మారుతుంది. అందువల్ల క్రెడిట్ కార్డుపై తీసుకునే లోన్ అధిక వడ్డీతో వచ్చినప్పుడు వచ్చే నష్టాలను ఇన్వెస్టర్లు ముందుగానే గుర్తించటం మంచిది.

స్టాక్‌లలో పెట్టుబడి పెట్టడం అనేది స్వాభావిక నష్టాలను కలిగి ఉంటుంది. అరువు తెచ్చుకున్న డబ్బును ఉపయోగించడం వలన ఆ నష్టాన్ని పెంచుతుందని గుర్తించాల్సిన అంశం. క్రెడిట్ కార్డులో ఉండే బ్యాలెన్స్ రిస్కీ పెట్టుబడులను కొనుగోలుకు దూరంగా ఉండటం ఇన్వెస్టర్లకు సూచించబడింది.