Indane Gas కస్టమర్లకు గుడ్‌న్యూస్: ఒక్క మిస్డ్ కాల్‌తో ఎల్పీజీ సిలిండర్ బుకింగ్

ఇండియన్ ఆయిల్ కార్పోరేషన్(IOC) సిలిండర్ కస్టమర్లు తమ లిక్విఫైడ్ పెట్రోలియం గ్యాస్(LPG) సిలిండర్‌ను రీఫిల్ చేసుకోవడానికి ఒక మిస్డ్ కాల్ ఇస్తే సరిపోతుంది. ఐవోసీ ప్రకటన ప్రకారం ఇండేన్ గ్యాస్ కస్టమర్లు దేశవ్యాప్తంగా 8454955555 నెంబర్ ద్వారా గ్యాస్ రీఫిల్ కోసం బుక్ చేసుకోవచ్చు. ఇప్పుడు మిస్డ్ కాల్ ద్వారా బుక్ చేసుకోవచ్చు. 'మిస్డ్ కాల్ ద్వారా బుకింగ్ చేసుకోవచ్చునని, తద్వారా కస్టమర్లు పదేపదే కాల్ చేయడాన్ని నిరోధిస్తుంది' అని తన ప్రకటనలో తెలిపింది.

వీరికి ఎంతో ప్రయోజనకరం

ఇంటరాక్టివ్ వాయిస్ రెస్పాన్స్ (IVR)తో పోలిస్తే కాల్ ఛార్జీలు విధించబడవని తెలిపింది. ఐవీఆర్ కాల్స్ గురించి బాగా తెలియని వారికి, సీనియర్ సిటిజన్లకు, గ్రామీణ ప్రాంతాల్లో నివసించేవారికి ఈ సర్వీస్ ఎంతో ఉపయోగపడుతుందని వెల్లడించింది. ఒడిశాలోని భువనేశ్వర్‌లో జరిగిన ఓ కార్యక్రమంలో కేంద్రమంత్రి ధర్మేంద్ర ప్రధాన్.. ఎల్పీజీ కస్టమర్ల కోసం ఈ మిస్డ్ కాల్స్ సేవలను ప్రారంభించారు. ఈ సేవలను మున్ముందు దేశమంతటికి విస్తరిస్తారు.

రోజు నుండి కొద్ది గంటలు...

ఎల్పీజీ డెలివరీ వ్యవధిని ఒకరోజు నుండి కొద్ది గంటల్లోకి తగ్గించేలా గ్యాస్ ఏజెన్సీలు, పంపిణీదారులు ప్రయత్నాలు చేయాలని కూడా ఈ సందర్భంగా కేంద్రమంత్రి కోరారు. ఎల్పీజీలో భారత్ చాలా దూరం ముందుకు వెళ్లిందని, 2014కు ముందు ఇచ్చిన ఎల్పీజీ కనెక్షన్లు 13 కోట్ల వరకు ఉంటే, గత ఆరేళ్లలోనే 30 కోట్లకు పైగా ఇచ్చినట్లు కేంద్రమంత్రి తెలిపారు.

ఇటీవలె కొత్త నెంబర్

కాగా, ఇండేన్ గ్యాస్ బుకింగ్ నెంబర్ ఇటీవల మారిన విషయం తెలిసిందే. నవంబర్ 1వ తేదీ నుండి కొత్త నెంబర్ అమలులోకి వచ్చింది. కస్టమర్ సౌలభ్యం కోసం ఇండియన్ ఆయిల్ దేశవ్యాప్తంగా ఇండేన్ ఎల్పీజీ రీఫిల్ బుకింగ్ కోసం ఒక కామన్ నెంబర్‌ను ప్రారంభించింది. ఈ కామన్ బుకింగ్ నెంబర్ 7718955555. దేశానికి అంతటికీ ఇదే నెంబర్ వర్తిస్తుంది. కస్టమర్లకు 24x7 ఈ నెంబర్ అందుబాటులో ఉంటుంది.