How to fix credit score : మీ క్రెడిట్ స్కోర్‌ను మెరుగుపరిచే 5 అద్భుతమైన మార్గాలు!

ఈ రోజుల్లో పర్సనల్ లోన్ కావాలన్నా, ఇల్లు కొనడానికి హోమ్ లోన్ కావాలన్నా బ్యాంకులు మొదట చూసేది మీ 'క్రెడిట్ స్కోర్'. సిబిల్ (CIBIL) స్కోర్ కూడా దాదాపు ఇలాంటిదే. ఈ రెండింటికీ కొంత తేడా ఉన్నప్పటికీ.. ఈ రెండు స్కోర్లు బాగుంటేనే బ్యాంకులు మిమ్మల్ని నమ్మి తక్కువ వడ్డీకే రుణాలు ఇస్తాయి. ఒకవేళ గతంలో చేసిన చిన్న చిన్న పొరపాట్ల వల్ల మీ స్కోర్ తగ్గిపోతే.. దాని గురించి ఆందోళన చెందాల్సిన అవసరం లేదు. క్రెడిట్ స్కోర్ ను ఫిక్స్ చేయడం ఎలాగో (how to fix credit score) తెలుసుకుంటే చాలు.

క్రెడిట్ స్కోర్ అనేది మీ గత ఆర్థిక క్రమశిక్షణకు అద్దం పడుతుంది. మీరు తీసుకున్న అప్పులను ఎంత సకాలంలో తిరిగి చెల్లిస్తున్నారు అనే దానిపైనే ఈ స్కోర్ ఆధారపడి ఉంటుంది. మీ స్కోర్‌ను మెరుగుపరచుకోవడానికి కొన్ని ముఖ్యమైన టిప్స్ ను ఫాలో అవ్వండి.

1. బిల్లుల చెల్లింపులో ఆలస్యం వద్దు

క్రెడిట్ స్కోర్‌ను ప్రభావితం చేసే అతిపెద్ద అంశం 'పేమెంట్ హిస్టరీ'. మీ క్రెడిట్ కార్డ్ బిల్లులు లేదా లోన్ EMIలు ఒక్క రోజు కూడా ఆలస్యం కాకుండా చూసుకోండి. వీలైతే మీ బ్యాంక్ అకౌంట్‌లో 'ఆటో-డెబిట్' ఆప్షన్‌ను పెట్టుకోండి. దీనివల్ల గడువు తేదీలోపు డబ్బులు కట్ అయిపోతాయి, ఫలితంగా మీ స్కోర్ క్రమంగా పెరుగుతుంది.

2. క్రెడిట్ యుటిలైజేషన్ రేషియో (CUR) తగ్గించండి

మీకు లక్ష రూపాయల క్రెడిట్ లిమిట్ ఉంటే, అందులో మొత్తం వాడేయకండి. సాధారణంగా మీ లిమిట్‌లో 30 శాతం కంటే తక్కువ వాడటం మంచిది. ఉదాహరణకు, రూ. 1,00,000 లిమిట్ ఉంటే కేవలం రూ. 30,000 లోపే ఖర్చు చేయడానికి ప్రయత్నించండి. మీరు లిమిట్ అంతా వాడేస్తుంటే.. మీరు అప్పులపై ఎక్కువగా ఆధారపడుతున్నారని బ్యాంకులు భావిస్తాయి. దీనివల్ల స్కోర్ తగ్గుతుంది.

3. పాత క్రెడిట్ కార్డులను క్లోజ్ చేయకండి

చాలామంది వాడుకలో లేని పాత క్రెడిట్ కార్డులను వెంటనే క్లోజ్ చేస్తుంటారు. కానీ, మీ క్రెడిట్ హిస్టరీ ఎంత పాతది అయితే మీ స్కోర్ అంత బాగుంటుంది. పాత కార్డ్ క్లోజ్ చేయడం వల్ల మీ క్రెడిట్ వయస్సు (Credit Age) తగ్గిపోతుంది. కాబట్టి, ఎటువంటి వార్షిక రుసుము లేని పాత కార్డులను అలాగే ఉంచడం శ్రేయస్కరం.

4. క్రెడిట్ రిపోర్టును తరచుగా చెక్ చేయండి

కొన్నిసార్లు బ్యాంకుల వైపు నుంచి జరిగే పొరపాట్ల వల్ల కూడా మీ స్కోర్ తగ్గే అవకాశం ఉంది. అందుకే ప్రతి మూడు నెలలకు ఒకసారి మీ క్రెడిట్ రిపోర్టును క్షుణ్ణంగా పరిశీలించండి. అందులో మీరు కట్టేసిన లోన్లు ఇంకా యాక్టివ్‌ గా ఉన్నా లేదా తప్పుడు లావాదేవీలు ఉన్నా వెంటనే సంబంధిత సంస్థకు ఫిర్యాదు చేయండి. ఈ చిన్న మార్పులే క్రెడిట్ స్కోర్ విషయంలో కీలక పాత్ర పోషిస్తాయి.

5. ఎక్కువ లోన్ల కోసం ప్రయత్నించకండి

మీరు పదే పదే కొత్త క్రెడిట్ కార్డుల కోసం లేదా లోన్ల కోసం అప్లై చేస్తుంటే, బ్యాంకులు మీ రిపోర్టును పదే పదే చెక్ చేస్తాయి (దీనిని Hard Inquiry అంటారు). ఇలా చేయడం వల్ల మీ స్కోర్ కొన్ని పాయింట్లు తగ్గుతుంది. అవసరం ఉంటే తప్ప పదే పదే లోన్ అప్లికేషన్లు పెట్టకండి.
ముగింపుగా చెప్పాలంటే, క్రెడిట్ స్కోర్ అనేది రాత్రికి రాత్రే పెరిగేది కాదు. దీనికి కనీసం 3 నుండి 6 నెలల సమయం పడుతుంది. క్రమశిక్షణతో కూడిన ఖర్చులు, సకాలంలో చెల్లింపులు ఉంటే మీ స్కోర్ 800 మార్కును సులభంగా దాటుతుంది. అప్పుడు మీరు కోరుకున్న లోన్లను అతి తక్కువ వడ్డీ రేట్లకే పొందవచ్చు.