Credit card: మీ క్రెడిట్ కార్డ్ అప్లికేషన్ రిజెక్ట్ అవుతుందా? అయితే ఇలా చేసి చూడండి!

ఒకప్పుడు క్రెడిట్ కార్డ్ (Credit card) పొందాలంటే బ్యాంకుల చుట్టూ తిరగడం, కుప్పలు తెప్పలుగా పేపర్లపై సంతకాలు చేయడం అవసరమయ్యేది. కానీ, ఇప్పుడు కాలం మారింది. కేవలం మీ స్మార్ట్‌ఫోన్ లేదా ల్యాప్‌టాప్ ఉంటే చాలు, పది నిమిషాల్లో అప్లికేషన్ ప్రక్రియను పూర్తి చేయవచ్చు. అయితే సరైన అవగాహన లేకుండా అప్లై చేస్తే అప్లికేషన్ రిజెక్ట్ అయ్యే అవకాశం ఉంది. అందుకే ఆన్‌లైన్‌లో క్రెడిట్ కార్డ్ పొందే విధానాన్ని స్టెప్-బై-స్టెప్ ఇక్కడ తెలుసుకుందాం.

దరఖాస్తుకు ముందు ఏం చూసుకోవాలి?

ముందుగా మీ అవసరానికి తగ్గ కార్డును ఎంచుకోవాలి. మీరు ఎక్కువగా షాపింగ్ చేస్తారా? లేదా ట్రావెలింగ్ కోసం వాడుతారా? అనే దానిపై మీకు స్పష్టత ఉండాలి. అలాగే దరఖాస్తు చేసే ముందు ఈ క్రింది బేసిక్ అర్హతలను చెక్ చేసుకోండి..

• వయస్సు: సాధారణంగా 21 నుండి 60 ఏళ్ల మధ్య ఉండాలి.
• ఆదాయం: మీ నెలవారీ జీతం లేదా వార్షిక ఆదాయం బ్యాంక్ నిబంధనలకు అనుగుణంగా ఉండాలి.
• సిబిల్ స్కోర్ (CIBIL): మంచి క్రెడిట్ హిస్టరీ ఉంటే కార్డు త్వరగా అప్రూవ్ అవుతుంది. సాధారణంగా 750 కంటే ఎక్కువ స్కోర్ ఉంటే ఉత్తమం.

ఆన్‌లైన్ అప్లికేషన్ ప్రాసెస్: స్టెప్-బై-స్టెప్

• స్టెప్ 1: సరైన కార్డును ఎంచుకోండి: మీ ఖర్చుల శైలిని బట్టి క్యాష్‌బ్యాక్, రివార్డ్ పాయింట్లు లేదా ట్రావెల్ బెనిఫిట్స్ ఇచ్చే కార్డును ఎంపిక చేసుకోండి.
• స్టెప్ 2: అర్హతను తనిఖీ చేయండి: బ్యాంక్ వెబ్‌సైట్‌లో మీ ఆదాయం, ఉద్యోగ వివరాలను బట్టి మీకు ఏ కార్డు వస్తుందో ముందే చూసుకోవచ్చు.
• స్టెప్ 3: ఫారమ్‌ను నింపండి: మీ పేరు, ఫోన్ నంబర్, చిరునామా , పాన్ (PAN) కార్డ్ వివరాలను తప్పులు లేకుండా నమోదు చేయండి.
• స్టెప్ 4: డాక్యుమెంట్లు అప్‌లోడ్ చేయండి: ఆధార్ కార్డ్ (అడ్రస్ ప్రూఫ్), పాన్ కార్డ్ (ఐడి ప్రూఫ్) , గత మూడు నెలల శాలరీ స్లిప్పులు లేదా ఐటీ రిటర్న్స్ పత్రాలను స్కాన్ చేసి అప్‌లోడ్ చేయాలి.
• స్టెప్ 5: వీడియో కేవైసీ (Video KYC): ఇప్పుడు ఫిజికల్ వెరిఫికేషన్ అవసరం లేకుండా బ్యాంక్ ప్రతినిధితో వీడియో కాల్ ద్వారా మీ వివరాలను ధృవీకరించుకోవచ్చు.
• స్టెప్ 6: అప్రూవల్ , డెలివరీ: వెరిఫికేషన్ పూర్తయిన తర్వాత, బ్యాంక్ మీ అప్లికేషన్‌ను ఆమోదిస్తే, 7 నుండి 10 పనిదినాల్లో కార్డ్ మీ ఇంటికి వస్తుంది.

గుర్తుంచుకోవాల్సిన ముఖ్య విషయాలు

క్రెడిట్ కార్డ్ (Credit card) పొందిన తర్వాత దానిని బాధ్యతాయుతంగా వాడటం ముఖ్యం. బిల్లులను సకాలంలో చెల్లించకపోతే భారీ వడ్డీ పడటమే కాకుండా మీ క్రెడిట్ స్కోర్ కూడా దెబ్బతింటుంది. అలాగే ఒకేసారి నాలుగైదు బ్యాంకుల్లో కార్డు కోసం దరఖాస్తు చేయకండి. ఇది మీ క్రెడిట్ రిపోర్ట్‌పై ప్రతికూల ప్రభావం చూపుతుంది. ఆన్‌లైన్ ద్వారా అప్లై చేసేటప్పుడు ఎల్లప్పుడూ బ్యాంక్ అధికారిక వెబ్‌సైట్ లేదా యాప్‌ను మాత్రమే వాడండి.

నేటి డిజిటల్ యుగంలో క్రెడిట్ కార్డ్ పొందడం చాలా సులభం. పైన పేర్కొన్న జాగ్రత్తలు పాటిస్తూ దరఖాస్తు చేసుకుంటే.. ఎటువంటి ఆటంకాలు లేకుండా మీ చేతికి కార్డు అందుతుంది. అయితే క్రెడిట్ కార్డును పరిమితంగా, తెలివిగా వాడటం వల్ల ఆర్థిక క్రమశిక్షణతో పాటు రివార్డులను కూడా పొందవచ్చు.