దీపావళి శుభవార్త, మీ పీఎఫ్ బ్యాలెన్స్ ఈ 4 మార్గాల్లో చెక్ చేయండి

2020-21 ఆర్థిక సంవత్సరానికి సంబంధించి ఎంప్లాయీస్ ప్రావిడెంట్ ఫండ్ (EPF)పై వడ్డీ రేటును 8.5 శాతం ఇచ్చేందుకు కేంద్ర ఆర్థిక మంత్రిత్వ శాఖ ఇటీవల ఆమోదం తెలిపింది. ఇందుకు సంబంధించి త్వరలో నోటిఫికేషన్ జారీ కానుంది. 2020-21 ఆర్థిక సంవత్సరానికి ఈపీఎఫ్‌పై 8.5 శాతం చొప్పున వడ్డీ జమ చేయాలని ఈ ఏడాది మార్చిలో EPFO నిర్ణయ మండలి కేంద్ర ధర్మకర్తల బోర్డు ప్రతిపాదించింది. ఇందుకు కార్మిక శాఖ సమ్మతించింది. తాజాగా ఈ ప్రతిపాదనకు కేంద్ర ఆర్థిక శాఖ నుండి ఆమోదం లభించినట్లుగా చెబుతున్నారు. దీంతో 6 కోట్లకు పైగా ఈపీఎఫ్ సబ్‌స్క్రైబర్లకు ప్రయోజనం చేకూరుతుంది. దీపావళి సమయంలో పీఎఫ్ సబ్‌స్క్రైబర్లకు ఇది గుడ్‌‌న్యూస్. అయితే ఈ పీఎఫ్‌ను వివిధ మార్గాల్లో చెక్ చేసుకోవచ్చు. అవేమిటో తెలుసుకుందాం.

ఉమాంగ్ యాప్ ద్వారా

మొబైల్ ఫోన్‌లోని ఉమాంగ్ యాప్ ద్వారా పీఎఫ్ బ్యాలెన్స్ మొత్తాన్ని చెక్ చేసుకోవచ్చు. ఈ యాప్‌ను కేంద్ర ప్రభుత్వం లాంచ్ చేసింది. ఈ యాప్ ద్వారా వివిధ ప్రభుత్వ పథకాలు, సేవలకు యాక్సెస్ కావొచ్చు. అంటే ప్రభుత్వ పథకాలకు అన్నింటికి ఒకే ప్లాట్‍‌ఫాం ఉమాంగ్. ఇందులో ఈపీఎప్ పాస్‌బుక్‌ను చూడవచ్చు. ఈపీఎఫ్ క్లెయిమ్స్‌ను రెయిజ్ చేయవచ్చు, ట్రాక్ చేయవచ్చు. ఉమాంగ్ యాప్‌ను డౌన్ లోడ్ చేసిన తర్వాత ఈపీఎఫ్ మెంబర్స్ వన్ టైమ్ పాస్ వర్డ్ రిజిస్ట్రేషన్ అవసరం.

ఈ యాప్‌లోని ఎంప్లాయీ సెంట్రిక్ సర్వీసెస్ విభాగంలోకి వెళ్లి 'వ్యూ పాస్‌బుక్‌ను క్లిక్ చేయాలి. మీ UAN నెంబర్‌తో పాటు మీ మొబైల్ నెంబర్‌కు వచ్చే ఓటీపీని ఎంటర్‌ చేయాలి. అప్పుడు కనిపించే మెంబర్ ఐడీని క్లిక్ చేయడం ద్వారా పీఎఫ్ బ్యాలెన్స్‌ను పొందొచ్చు. అయితే, మీ పీఎఫ్ ఖాతాతో మొబైల్ నెంబర్ ముందే జత చేసి ఉండాలి.

ఈపీఎఫ్ఓ పోర్టల్ ద్వారా

EPFO సభ్యత్వ పోర్టల్‌లో రిజిస్టర్ చేసుకున్న మెంబర్స్ epfindia.gov.in/site_en/index.php వెబ్‌సైట్‌కు వెళ్లి బ్యాలెన్స్ చెక్ చేసుకోవచ్చు. అందులో 'Our Services'లోకి వెళ్లి, For Employees పైన క్లిక్ చేయాలి. 'Member Passbook' under 'Services' విభాగంలోకి నెళ్లాలి. అప్పుడు UAN నెంబర్, పాస్‌వర్డ్ ఎంటర్‌ చేయడం కోసం మరో పేజీకి రీడైరెక్ట్‌ అవుతుంది. వివరాలు ఎంటర్ చేసి, మీ ఖాతా వివరాలు తెలుసుకోవచ్చు.

ఎస్సెమ్మెస్ ద్వారా

UAN యాక్టివేట్ చేసుకున్న సబ్‌స్క్రైబర్లు ఈపీఎఫ్ రిజిస్టర్డ్ మొబైల్ ద్వారా 'EPFOHO UAN' అని టైప్ చేసి 77382 99899 నెంబ‌ర్‌కు ఎస్సెమ్మెస్ పంపించాలి. ఈ సదుపాయం పది ప్రాంతీయ భాషల్లో అందుబాటులో ఉంది. తెలుగులో కావాలంటే EPFOHO UAN TEL అని ఎస్సెమ్మెస్‌ పంపించాలి. ఇంగ్లీష్‌తో పాటు హిందీ, పంజాబీ, గుజరాతి, మరాఠీ, కన్నడ, తెలుగు, తమిళం, మలయాళం, బెంగాళీ భాషల్లో ఉంది.

మిస్డ్ కాల్ ద్వారా

EPFO రిజిస్టర్డ్ మొబైల్ నెంబర్ నుండి 011-22901406కు మిస్డ్ కాల్ ఇవ్వడం ద్వారా బ్యాలెన్స్ తెలుసుకోవచ్చు. మీరు మిస్డ్ కాల్ ఇచ్చాక ఓ రింగ్ అయి కట్ అవుతుంది. కాసేపటికి మీ బ్యాలెన్స్ ఎస్సెమ్మెస్ రూపంలో వస్తుంది.