తెలుగు రాష్ట్రాలకు ఎయిర్‌టెల్ గుడ్‌న్యూస్, వైఫై కాల్స్ చేసుకోవచ్చు: ఏ ఫోన్లలో, ఎలా...?

వైఫై నెట్ వర్క్‌ను వినియోగించుకొని వాట్సాప్, స్కైప్, గూగుల్ డుయో కాల్స్ చేసుకోవడం తెలిసిందే. అయితే భారతీ ఎయిర్ టెల్ తమ ప్రీపెయిడ్, పోస్ట్ పేయిడ్ కస్టమర్లకు సరికొత్త అవకాశాన్ని తెచ్చింది. ఈ వైఫైతో సాధారణ కాల్స్ చేసుకునే సదుపాయాన్ని తెలుగు రాష్ట్రాలతో పాటు వివిధ ప్రాంతాల్లో కల్పించింది. ఈ మేరకు భారతీ ఎయిర్ టెల్ ప్రకటన చేసింది.

ఏపీ, తెలంగాణ సహా ఈ 6 రీజియన్లలో...

వైఫైతో సాధారణ కాల్స్ చేసుకునే వెసులుబాటును ఆంధ్రప్రదేశ్, తెలంగాణ రాష్ట్రాలతో పాటు కర్ణాటక, తమిళనాడు, ముంబై, కోల్‌కతా టెలికం సర్కిల్స్‌లలో ఈ అవకాశం కల్పించింది. ఈ నెల ప్రారంభంలో ఢిల్లీ-NCR ప్రాంతంలో దీనిని ప్రారంభించారు. ఇప్పుడు మరో ఆరు రీజియన్లకు దీనిని విస్తరించారు. ఇది ఎయిర్‌టెల్ మొబైల్ సబ్‌స్క్రైబర్స్ అందరికీ వర్తిస్తుంది. ఆరు టెలికం సర్కిల్స్‌లోని ప్రీపెయిడ్, పోస్ట్ పెయిడ్ కస్టమర్లకు ఇది అందుబాటులో ఉంటుంది.

ప్రత్యేక యాప్ అవసరం లేదు...

ఆరు రీజియన్లలో భాగంగా ఏపీ, తెలంగాణలకు వైఫై కాల్స్ చేసుకునే సదుపాయం కల్పించినట్లు ఎయిర్‌టెల్ తెలిపింది. ఇళ్లు, కార్యాలయాల్లో ఉన్నప్పుడు, వైఫై సదుపాయం ఉంటే ఎయిర్‌టెల్ స్మార్ట్ ఫోన్ల వినియోగదారులు అదనపు ఖర్చు లేకుండానే కాల్స్ చేసుకోవచ్చు. ఇందు కోసం ప్రత్యేక యాప్ కూడా ఇన్‌స్టాల్ చేసుకోవాల్సిన అవసరం లేదు.

ప్రస్తుతానికి ఎక్స్‌స్ట్రీమ్ ఫైబర్ హోమ్ బ్రాడ్ బ్యాండుకే..

తెలుగు రాష్ట్రాలలో తొలిసారి ఎయిర్‌టెల్ వీవో వైఫై సదుపాయాన్ని ప్రవేశ పెట్టిందని భారతీ ఎయిర్‌టెల్ ఏపీ, తెలంగాణ సీఈవో అవన్‌నీత్ సింగ్ పూరి తెలిపారు. తొలుత ఎయిర్‌టెల్ ఎక్స్‌ట్రీమ్ ఫైబర్ హోమ్ బ్రాడ్ బ్యాండుకే ఈ సదుపాయం కల్పిస్తున్నామని, ఆ తర్వాత ఇతర బ్రాడ్ బాండ్ సర్వీసులు, వైఫై హాట్ స్పాట్ కేంద్రాలలోను వినియోగించుకునే వెసులుబాటు ఉంటుందన్నారు.

వైఫై ఏ ఫోన్లలో...

ఈ ఫోన్లలో వైఫై సౌకర్యం అందుబాటులో ఉంటుంది..

- ఐఫోన్ మోడల్స్ 6S, iPhone 11 Pro, iPhone 11, iPhone XR, iPhone XS, iPhone XS Max, iPhone X, iPhone 8 and iPhone 8 Plus, iPhone 7, iPhone 7 Plus, iPhone 6s, iPhone 6s Plus, iPhone SE

- షియోమీ - Redmi K20, Redmi K20 Pro and POCO F1

- శాంసంగ్ S10, S10 , S10e, M20 and One Plus 6 and 6T, J6, A10s, On6, M30s,

- వన్ ప్లస్ OnePlus 7, OnePlus 7 Pro, OnePlus 7T, OnePlus 7T Pro

ఎలా వినియోగించాలి?

- స్మార్ట్ ఫోన్ నుంచి కాల్ చేసేందుకు వీలవుతుందో లేదో ఎయిర్‌టెల్ డాట్ ఇన్/వైఫై కాలింగ్‌లో చెక్ చేసుకోవాలి.

- ఆ తర్వాత వైఫై కాలింగ్‌కు ఉపకరించే తాజా వర్షన్‌కు ఆపరేటింగ్ సిస్టంను అప్ గ్రేడ్ చేయాలి.

- ఫోన్ సెట్టింగ్స్‌లో వైఫై కాలింగ్ ఫీచర్‌ను ఆన్ చేయాలి.

- VoLTE సదుపాయాన్ని ఆన్ చేసి ఉంచుకుంటే ఈ కాల్స్ చేసుకోవచ్చు.