PMSYM గురించి పూర్తిగా తెలుసుకోండి: దరఖాస్తు ఎలా, బయటకు వస్తే నష్టమేంటి?

అసంఘటిత రంగంలో పనిచేసే కార్మికులకు అండగా నిలిచేందుకు కేంద్ర ప్రభుత్వం ప్రధానమంత్రి శ్రమయోగి మాన్‌ధన్ (pmsym) పథకాన్ని ఇటీవల ప్రవేశపెట్టిన విషయం తెలిసిందే. ఈ పథకంలో చేరే కార్మికులు ఎంతమేర ప్రీమియం చెల్లిస్తే దానికి సమానంగా కేంద్ర ప్రభుత్వం చెల్లిస్తుంది. 60 ఏళ్లు దాటిన తర్వాత ప్రతి నెల రూ.3వేల పెన్షన్ వస్తుంది. ఈ పథకంలో కార్మికుడు తన వాటా కింద ప్రీమియం చెల్లించాలి. చాలామందికి దీనిపై అంతగా అవగాహన లేదు. నెలకు రూ.15వేలు ఆదాయం వచ్చే 18 నుంచి 40 వయస్సు గల అసంఘటిత కార్మికులు ఈ స్కీంలో చేరవచ్చు. వీరికి 60 ఏళ్ల తర్వాత నెలకు రూ.3వేలు వస్తాయి.

pmsym ఎవరు అర్హులు, ఎలా దరఖాస్తు

అసంఘటిత కార్మికునికి 60 ఏళ్లు నిండిన తర్వాత జీవితకాలం ప్రతి నెల రూ.3వేల పెన్షన్ వస్తుంది. బ్యాంక్ అకౌంట్ ద్వారా అందుతుంది. మరణిస్తే నామినీకి పింఛన్ మొత్తంలో 50 శాతం లభిస్తుంది. అతను 60 ఏళ్ల లోపు మృతి చెందితే కట్టిన ప్రీమియాన్ని వడ్డీతో కలిపి నామినికి చెల్లిస్తారు. 18 ఏళ్ల నుంచి 40 ఏళ్ల వయస్సు కలిగిన వారు ఈ స్కీంలో చేరవచ్చు. 60 ఏళ్ల వరకు దీనిని చెల్లించాలి. అంటే 20 నుంచి 42 ఏళ్లు చెల్లించాలి. ఇతర పెన్షన్ పథకాల్లో సభ్యులు కానివారు, ఐటీ రిటర్న్స్ ఫైల్ చేయనివారు, నెల ఆదాయం రూ.15వేల లోపు ఉన్నవారు దీనికి అర్హులు. పనివాళ్లు, భవన నిర్మాణ కార్మికులు, ఇళ్లల్లో పనిచేసేవారు, వ్యవసాయ కూలీలు, చెత్త ఎరుకుని విక్రయించేవారు, ఆటో, రిక్షా, ప్రయివేటు డ్రైవర్లు, బీడీ, చేనేత, రజక, కుమ్మరి, దర్జీ వంటి చేతి వృత్తుల వారు అర్హులు. అర్హులైన వారు దగ్గరలోని కామన్ సర్వీస్ సెంటర్‌కు వెళ్లి తమ పేరును నమోదు చేసుకోవాలి. అవసరమైన వివరాలు, డాక్యుమెంట్లు ఇవ్వాలి.

ఇవి ఇవ్వండి

అర్హులైన వారు తమ ఆధార్ నెంబర్‌తో అనుసంధానమైన బ్యాంక్ అకౌంట్, సెల్ ఫోన్ నెంబర్, ఇవ్వాలి. వయసు ఆధారంగా నెలకు ప్రీమియం రూ.55 నుంచి రూ.200 వరకు చెల్లించాల్సి ఉంటుంది. కార్మికుడు చెల్లించిన దానికి సమానంగా కేంద్ర ప్రభుత్వం చెల్లిస్తుంది. కార్మికుడు 60 ఏళ్లు వచ్చే వరకు ప్రీమియం చెల్లించాలి. తొలి నెల ప్రీమియం నగదు రూపంలో మిగిలిన ప్రీమియంలు బ్యాంకు ఖాతా నుంచి నేరుగా పథకం పేరుతో జమ అవుతాయి. ఆధార్ నెంబర్, బ్యాంకు అకౌంట్, పాస్‌బుక్‌లు ఇవ్వవలసి ఉంటుంది. వయస్సు, ఆదాయానికి సంబంధించిన డిక్లరేషన్ తప్పుగా ఇస్తే పెనాల్టి ఉండే అవకాశాలు ఉంటాయి. ఈ పెన్షన్ స్కీం ఫండ్ మేనేజర్, సబ్‌స్బ్రైబర్‌కు పేమెంట్ సర్వీస్ప్రొవైడర్ ఎల్ఐసీ.

pmsym ఎగ్జిట్ రూల్స్

pmsym స్కీంలో చేరిన వారు ఏదైనా ఆర్గనైజ్డ్ సెక్టార్‌లోకి వెళ్తే, అందులో మూడేళ్ల పాటు ఉంటే.. మీ అకౌంట్ అలాగే కొనసాగుతుంది. కానీ ఆ కాలానికి ప్రభుత్వం కాంట్రిబ్యూషన్ ఆగిపోతుంది. ఒకవేళ సబ్‌స్క్రైబర్ కనుక మొత్తం అమౌంట్ చెల్లించుకోవచ్చు.

ఈపీఎఫ్ఓ వెబ్ సైట్ ప్రకారం 60 ఏళ్లు వచ్చాక మీ అమౌంట్ విత్ డ్రా చేసుకోవచ్చు. ఆ సమయంలోని బ్యాంకు ఇంట్రెస్ట్‌తో కలిపి తీసుకోవచ్చు.

అయిదేళ్ల తర్వాత ఈ స్కీం వద్దనుకుంటే సేవింగ్ బ్యాంక్ ఇంట్రెస్ట్ రేటుతో కలిపి ఇస్తారు.

మరో విషయం గుర్తుంచుకోండి. పెన్షన్ ప్రారంభానికి ముందు, పదేళ్ల కంట్రిబ్యూషన్ తర్వాత సబ్‌స్క్రైబర్ ఈ స్కీం నుంచి వెళ్లిపోవాలనుకుంటే కేవలం మీ కంట్రిబ్యూషన్ మాత్రమే ఇస్తారు. కానీ గవర్నమెంట్ కంట్రిబ్యూషన్ రాదు.

ఏ వయస్సులో ఎంత కంట్రిబ్యూషన్ అంటే

18 ఏళ్ల నుంచి 40 ఏళ్ల మధ్య వయస్సు గల వారు ఈ పెన్షన్ స్కీంలో చేరవచ్చు. 60 ఏళ్ల వయస్సు వరకు చెల్లించాలి. తక్కువ వయస్సులో చేరితే తక్కువ మొత్తం నుంచి ప్రారంభమవుతుంది. కార్మికుడి కంట్రిబ్యూషన్ ఎంతగా ఉంటే గవర్నమెంట్ కంట్రిబ్యూషన్ కూడా అంతే ఉంటుంది. ఉదాహరణకు 18 ఏళ్ల వయస్సులో ప్రారంభిస్తే కార్మికుడి కంట్రిబ్యూషన్ రూ.55 అవుతుంది. ప్రభుత్వం అంతేమొత్తం ఇస్తుంది. మొత్తం రూ.110 అవుతుంది.

వయస్సు	కార్మికుడి కంట్రిబ్యూషన్	మొత్తం (ప్రభుత్వం కలిపి)
18	55	110
19	58	116
20	61	122
21	64	128
22	68	136
23	72	144
24	76	152
25	80	160
26	85	170
27	90	180
28	95	190
29	100	200
30	105	210
31	110	220
32	120	240
33	130	260
34	140	280
35	150	300
36	160	320
37	170	340
38	180	360
39	190	380
40	200	400