సిబ్బంది కోసం రైల్వే మొబైల్ యాప్‌

కేంద్ర ప్ర‌భుత్వ డిజిట‌ల్ వేగానికి త‌గ్గ‌ట్లుగా రైల్వే సైతం క‌దులుతోంది. ఆ దిశలో ద‌క్షిణ మ‌ధ్య రైల్వే ఎప్పుడూ ముందు ఉంటుంది. త‌మ సిబ్బంది కోసం దక్షిణ మధ్య రైల్వే వినూత్న మొబైల్ యాప్ అందుబాటులోకి వచ్చింది. ఈ మొబైల్ యాప్‌ను బుధవారం సికిందరాబాద్‌లోని జోనల్ రైల్వే ట్రైనింగ్ ఇన్‌స్టిట్యూట్‌లో ప్రిన్సిపల్ చీఫ్ ఆపరేషన్స్ మేనేజర్ ఎన్ మధుసూదన్ ప్రారంభించారు. రైల్వే ఆపరేషన్స్, కమర్షియల్ విభాగంలో పనిచేసే సిబ్బందికి ఇది ఎంతో ఉపయోగపడుతుంది. రైల్వేశాఖలోని కింది స్థాయి సిబ్బందికి తక్షణ సమాచారం కోసం అందుబాటులోకి తెచ్చిన యాప్‌తో వివిధ విభాగాలకు చెందిన సమాచారం త‌క్ష‌ణ‌మే తెలుసుకోవచ్చని అన్నారు.

railway App for staff

కేంద్ర ప్ర‌భుత్వం ప్ర‌వేశ‌పెట్టిన డిజిటలీక‌ర‌ణ‌లో భాగంగా రైల్వేశాఖను కూడా డిజిటలైజేషన్ చేసేందుకు జోనల్ రైల్వే ట్రైనింగ్ ఇన్స్టిట్యూట్ ఈ మొబైల్ యాప్‌ను అందుబాటులోకి తెచ్చిందన్నారు. ఈ యాప్‌ను గూగుల్ ప్లే స్టోర్ ద్వారా ఎలాంటి ఫోన్‌లోకైనా డౌన్‌లోడ్ చేసుకోవచ్చన్నారు. రైల్వే రిజర్వేషన్లు, రిజిస్టర్లు, సిగ్నల్ వ్యవస్థ, ప్రైవేట్ నెంబర్ల ఎక్ఛేంజ్ రిజిస్టర్లు డిజిటలైజేషన్ చేసే యోచనలో ఉన్నట్టు మధుసూదన్ తెలిపారు. రైల్వే సిబ్బంది ఈ యాప్‌తో తమ స్కిల్స్, నాలెడ్జ్‌ను పెంపొందించుకోవాలని ఆయన సూచించారు. ఈ కార్యక్రమంలో రైల్వే చీఫ్ ట్రాఫిక్ మేనేజర్ కెవి రావు, జోనల్ రైల్వే ట్రైనింగ్ ఇన్స్టిట్యూట్ ఏఎల్‌ఎన్ రెడ్డి తదితరులు పాల్గొన్నారు.