పెట్టుబడి విషయంలో మహిళలు చేసే పొరపాట్లు

మహిళలు డబ్బుని పొదుపుగా ఖర్చు చేస్తారని అందరూ అంటుంటారు. అది నిజమేనా? డబ్బు ఖర్చు విషయంలో మహిళా ఉద్యోగినులు చేసే ప్రధానమైన పొరపాట్లపై తాజాగా ఓ అధ్యయనం వెలువడింది. నలభై నాలుగువేల మంది మహిళలపై చేసిన ఈ అధ్యయనంలో వెల్లడైన విషయాలేంటో చూద్దాం.

* మహిళలు డబ్బు ఖర్చు విషయంలో పొదుపుగానే ఉంటారు. కానీ కొన్ని విషయాల్లో అవగాహన లేకపోవడం అనేది వారికి ఆర్ధిక నష్టాన్ని చేకూరుస్తోందని ఈ అధ్యయనంలో వెల్లడైంది.

* వాటిల్లో ముఖ్యమైనదిగా ఉద్యోగం మారినప్పుడల్లా పీఫ్ ఖాతాను మార్చడం. దీని వల్ల వారికి వృద్ధాప్యంలో అవసరమైన ఫించన్ విషయంలో తక్కువ లాభం పొందుతున్నారట. ఉద్యోగం మారినప్పుడల్లా కొత్త ఖాతా తెరవడం కూడా పాతది కొనసాగించడమే దీనికి పరిష్కారం అంటున్నారు నిపుణులు.

* పెట్టుబడులు పెట్టాల్సి వచ్చినప్పుడు మగవారితో పోలిస్తే మహిళలు 'నిపుణులు' అనే పదం వినబడగానే వారిపై ఎక్కువగా ఆధారపడతారట. కేవలం సంతకం పెట్టడానికి పరిమితవుతున్నారట. దీనివల్ల నష్టాలూ అదే స్థాయిలో పొందుతున్నారు.

* 'చిన్న మొత్తాలు ఏ పొదుపు చేస్తాయిలే' అనే నిర్లక్ష్యం చాలామందిలో కనిపించింది అని అధ్యయనం తెలిపింది. అదెంత చిన్న మొత్తమైనా సరే, క్రమం తప్పకుండా పొదుపు చేయడం వల్ల భవిష్యత్తులో పెద్దమొత్తంగా మారివారికి అండగా నిలుస్తుంది.

* తప్పనిసరి అవసరాలను గుర్తించి, పెట్టుబడి పెట్టె విషయంలో ఇంకా స్పష్టత సాధించాల్సి ఉందని అంటున్నారు నిపుణులు. ఓ పట్టుచీరని సాధారణంగా ఏడాది, రెండేళ్లకు ఓసారి తప్ప కట్టరు. కానీ వాటిని వేల రూపాయలు పెట్టి కొంటారు.

ఏది అవసరమో దానిపై పెట్టుబడి పెట్టే విషయంలో ఇంకాస్త లోతుగా ఆలోచిస్తే బాగుంటుందని అధ్యయనం వెల్లడించింది.