రుణాన్ని మరో బ్యాంకుకు ఎప్పుడు బదలీ చేసుకోవాలి? ఇవి తప్పనిసరి..

రుణ బదలీతో ప్రయోజనాలు

రుణ బదలీతో చాలా ప్రయోజనాలు ఉంటాయి. వడ్డీ రేటును తగ్గించుకునే వెసులుబాటు ఉంటుంది. పలు బ్యాంకులు టాప్-అప్ లోన్లను కూడా మంజూరు చేస్తాయి. అంటే ప్రస్తుత రుణానికి అదనంగా మరికొంత మొత్తాన్ని ఇస్తాయి. మనం ఏ బ్యాంకుకు అయితే లోన్‌ను బదలీ చేస్తున్నామో వారే రుణ మొత్తాన్ని మొదటి బ్యాంకుకు చెల్లిస్తారు. టాప్-అప్ లోన్ తీసుకుంటే ఆ మొత్తాన్ని మన ఖాతాలో జమ చేస్తారు. తొలి బ్యాంకుతో పోలిస్తే వడ్డీ రేటు కూడా తక్కువగా ఉండే అవకాశముంది. క్రెడిట్ హిస్టరీ బాగుంటే ప్రాసెసింగ్ ఫీజు రద్దు అవుతుంది. ఇతర ప్రయోజనాలు కూడా ఉంటాయి.

ఎప్పుడు వెళ్లాలి..

రుణ బదలీ చేసుకోవడానికి ముందు వడ్డీ రేటులో మంచి మార్పు ఉంటేనే వెళ్లడం మంచిది. లేదంటే కొత్త బ్యాంకులో ఉండే ప్రాసెసింగ్ ఫీజు వంటి వాటిని కలుపుకుంటే ప్రయోజనం తగ్గుతుంది. కాబట్టి వడ్డీ రేటు చాలా వరకు తక్కువగా ఉండాలి. అలా అయితేనే ప్రయోజనం ఉంటుంది. వడ్డీ రేటు, కాలపరిమితి, ఈఎంఐ వంటి అన్ని అంశాలను పరిగణలోకి తీసుకొని చూడాలి. అన్నింటిని పరిశీలించి, మొదటి బ్యాంకు కంటే రెండో బ్యాంకులో భారం తగ్గుతుందా లేదా చూసుకొని ముందడుగు వేయాలి.

ఇది మరింత మంచి మార్గం

చాలామంది హోమ్ లోన్ తర్వాత పర్సనల్ లోన్ తీసుకుంటారు. అలా కాకుండా హోమ్ లోన్ పైనే టాప్-అప్ తీసుకోవడం మంచిది. అప్పుడు వడ్డీ రేటు తగ్గుతుంది. వ్యక్తిగత రుణాన్ని బదలీ చేసుకోవడం కంటే ఇది మరింత మంచి మార్గం.

రుణాన్ని ట్రాన్సుఫర్ చేసుకోవడంలో కొన్ని ఇబ్బందులు కూడా ఉన్నాయి. ప్రాసెసింగ్ ఫీజు వంటి అదనపు ఛార్జీల చెల్లింపులు ఉంటాయి. రుణ కాలపరిమితి కూడా మారే అవకాశముంది. ఆర్థిక ప్రణాళికపై ప్రభావం చూపుతుంది. వీటన్నింటిని పరిగణలోకి తీసుకోవాలి.