క్రెడిట్ కార్డుతో కొనుగోలు... ఈఎంఐలతో జాగ్రత్త
ఇటీవల కాలంలో సెల్ ఫోన్, క్రెడిట్ కార్డులు మనిషి జీవితంలో భాగంగా మారాయి. క్రెడిట్ కార్డులతో కొనుగోలు జరిపినప్పుడు కొన్ని జాగ్రత్తలు తీసుకోవాలి. ఆ జాగ్రత్తలు ఏంటో ఇప్పుడు చూద్దాం. నెలసరి వాయిదాల రూపంలో చెల్లిస్తున్న నగదుకి వడ్డీ వసూలు చేస్తున్నారా లేదా అనేది ముందుగా గమనించాలి.
ఒకేసారి చెల్లిస్తే ఎంత అవుతుందో కనుక్కోండి. ఆ తర్వాత ఈఎంఐతో సరిపోల్చి చూసుకోండి. రెండు సరిపోతే సున్నా వడ్డీకే అందించినట్లు అవుతుంది, లేదంటే వడ్డీ భారం మీపైన పడుతున్నట్లే.
సాధారణంగా మీరు కొనుగోలు చేసిన వస్తువు మొత్తంపై వాయిదాలు చెల్లించేలా పథకాలుంటాయి. కొన్ని మొబైల్ ఫోన్లకు ఆరు నెలలు వాయిదా వరకే అనుమతిస్తే, మరికొన్ని ఫోన్లకు 12 నెలల వరకు ఈఎంఐ సౌకర్యాన్ని కల్పిస్తున్నాయి. నెలానెలా చెల్లించే సామర్ద్యాన్ని బట్టి అంచనా వేసుకుని కాలపరిమితిని నిర్ణయించుకోవడం మంచింది.
కొన్ని ప్రకటనల్లో చెప్పినట్లుగా వడ్డీ లేకుండా ఈఎంఐ, వాస్తవంలోకి వచ్చేసరికి తెలియని ఖర్చులు చాలా ఉంటాయి. రుసుములు రూపంలో మీ నుంచి ఎక్కువ మొత్తం రాబట్టుకునేలా చూస్తుంటారు. కాబట్టి అన్ని విషయాలు బేరీజు వేసుకున్న తర్వాతే ఆన్లైన్లో షాపింగ్ కొనుగోళ్లు చేయడం మంచిది.