గుడ్ న్యూస్: నగదు రూపంలోనూ ఫాస్టాగ్ రీఛార్జ్!

క్యాష్ తో ముందుకు...

నేషనల్ హైవేస్ అథారిటీ ఆఫ్ ఇండియా తీసుకున్న తాజా నిర్ణయంతో ఇకపై ఫాస్టాగ్ ను క్యాష్ తో రీఛార్జ్ చేసుకుని, టోల్ గేట్ల వద్ద వాహనాలు సాఫీగా సాగిపోవచ్చు. ప్రస్తుతం ఫాస్టాగ్ ను కేవలం ఆన్లైన్ రీఛార్జ్ విధానంలో మాత్రమే రీఛార్జ్ చేసుకునే సదుపాయం ఉంది. దీంతో చాలా మంది ఇంకా దీనికి అలవాటు పడలేదు. ఫాస్టాగ్ ఉన్నప్పటికీ అందులో టోల్ చెల్లింపులకు సరిపడే నగదు లేకపోవటంతో వాహనదారులు ఇబ్బంది పడుతున్నారు. దీనిని గుర్తించిన ఎన్ హెచ్ ఏ ఐ క్యాష్ రీఛార్జ్ ఆప్షన్ ను తెరపైకి తీసుకొచ్చింది.

ఇంకా 60% మే ...

ఫాస్టాగ్ ను తప్పనిసరి చేసి సరిగ్గా ఒక నెల రోజులు అవుతున్నా... దానిని వినియోగిస్తున్న వారి సంఖ్య ఆశించిన మేరకు పెరగలేదని ఎన్ హెచ్ ఏ ఐ గుర్తించింది. ప్రస్తుతం కేవలం 60% వాహనదారులు మాత్రమే ఫాస్టాగ్ ను వినియోగిస్తున్నారు. మరో 40 % మంది ఇంకా నగదు చెల్లింపులు చేస్తున్నారు. ఫాస్టాగ్ అమల్లోకి వచ్చిన కొత్తలో దాని వినియోగం విపరీతంగా పెరిగినప్పటికీ... మెల్లగా ఆ స్పీడ్ తగ్గినట్లు గుర్తించారు. అందుకే అందరికీ ప్రయోజనం చేకూర్చేలా ఎవరికీ ఇబ్బంది లేకుండా క్యాష్ ను కూడా అనుమతించాలని నిర్ణయించారు.

కోటి దాటిన ఫాస్టాగ్ లు...

దేశంలోని మొత్తం టోల్ గేట్ల లో దాదాపు 75% టోల్ గేట్ల వద్ద ఈటీసీ విధానాన్ని అమల్లోకి తీసుకొచ్చారు. అంటే సుమారు 535 టోల్ ప్లాజాల్లో ఫాస్టాగ్ విధానం అమల్లో ఉంది. ఈటీసీ లేన్ లో ఫాస్టాగ్ లేకుండా ప్రయాణించే వారికి డబుల్ టోల్ ఫీజ్ వసూలు చేస్తారు. అందుకే ఫాస్టాగ్ తీసుకునేందుకు వాహనదారులు ముందుకు వస్తున్నారు. ఇప్పటివరకు 1.26 కోట్ల వాహనాలకు ఫాస్టాగ్ ను వినియోగిస్తున్నట్లు ఎన్ హెచ్ ఏ ఐ గుర్తించింది. నగదు రీఛార్జ్ సౌకర్యం ఉంటే ఈ సంఖ్య మరింత పెరిగే అవకాశం ఉంటుందని భావిస్తున్నారు.