ప్రీమియం సరిగా చెల్లించారు... బీమా క్లెయిం మాత్రం రావ‌డం లేదు... ఎలా?

బీమా అంబుడ్స్‌మెన్‌

జీవిత బీమా తీసుకున్నవారు ప్రతిపాదన ఫారంలో వెల్లడించిన విషయాలపై క్లెయిం విషయంలో తుదినిర్ణయం ఆధారపడి ఉంటుంది. ఎందుకంటే బీమా ఒప్పందం అత్యంత మెరుగైన విశ్వసనీయతతో కొనసాగే ఒప్పందం.

బీమాకు సంబంధించిన నిర్ణయాలన్నింటికీ బీమా చట్టాలు మార్గదర్శకాలు. ఐఆర్‌డీఏఐ నిర్ణయమే బీమా క్లెయిం విషయంలో అంతిమ తీర్పు. మీకు ఏదైనా బీమా కంపెనీలో అన్యాయం జరిగిందని భావిస్తే ఇన్సూరెన్స్‌ అంబుడ్స్‌మెన్‌లో ఫిర్యాదు చేయవచ్చు. అక్కడా న్యాయం జరగలేదని భావిస్తే వినియోగదారుల ఫోరంను ఆశ్రయించవచ్చు.

నామినీకి వివరాలు

ప్రతి బీమాదారు తప్పక గుర్తుంచుకోవాల్సిన మరో విషయం ఇది. మీరు ఏ పాలసీ తీసుకున్నా సరే నామినీకి తప్పనిసరిగా ఆ వివరాలను, దానివల్ల వచ్చే ప్రయోజనాలు, క్లెయిమ్‌ ప్రక్రియ మొదలైన విషయాలన్నింటినీ తెలియజేయాలి. అవసరమైన పత్రాలన్నీ కూడా నామినీకి అందుబాటులో ఉండేలా చూడాలి. లేకపోతే పాలసీ తీసుకుని కూడా వ్యర్థమౌతుంది.

వ్యక్తిగత వివరాలు

పాలసీదారు పూర్తి సమాచారాన్ని అందివ్వకపోవడం వల్లే చాలా సందర్భాల్లో క్లెయిమ్‌లు తిరస్కారానికి గురవుతుం టాయి. కనుక, బీపీ, డయాబెటీస్‌ వంటివి ఏమైనా ఉన్నా, స్మోకింగ్‌, ఆల్కాహాల్‌ వంటి అలవాట్లు ఉన్నా తప్పనిసరిగా పాలసీ తీసుకునే సమయంలో పేర్కొనాలి. దీనివల్ల ప్రీమియం కొంత పెరిగితే పెరగొచ్చు. కానీ అంతిమంగా క్లెయిమ్‌ విషయానికొచ్చే సమస్యలు చాలా తగ్గుతాయి.

పాలసీ గురించి

తీసుకున్న పాలసీ గురిం చి, దాని నిబంధనలు మొదలైన వాటి గురించి క్షణ్ణంగా అర్థం చేసుకుంటే క్లెయిమ్స్‌ తిరస్కరణకు గురికాకుండా కొంతవరకూ జాగ్రత్తపడొచ్చు. అర్థంకాని నిబంధనలేమైనా ఉంటే బీమా కంపెనీని అడిగి తెలుసుకోవాలి. అంతేకానీ పాలసీ తీసుకునేటప్పుడు ఏజెంటు ఎక్కడ సంతకం పెడితే అక్కడ పెట్టేసి తర్వాత బాధపడితే ప్రయోజనం లేదు. పాలసీ కొనుగోలు సమయంలో కాకపోయినా 15 రోజుల సమయం ఉన్నప్పుడు పాలసీ నిబంధనలను క్షుణ్ణంగా చదివితే మీకే మంచిది.

డాక్యుమెం ట్లు

క్లెయిమ్‌తో పాటు ఒరిజినల్‌ లేదా అటెస్టెడ్‌ మరణ ధ్రువీకరణ పత్రాన్ని, మెడికల్‌ డాక్యుమెంట్స్‌ ఏమైనా ఉంటే.. వాటిని తప్పనిసరిగా జతచేయాలి. అన్ని డాక్యుమెంట్లు ఒక్కసారే ఇవ్వండి. సాధారణంగా ఒరిజినల్‌ పాలసీ పత్రం, పూర్తి చేసిన క్లెయిమ్స్‌ ఫారం, పాలసీదారుతో తన సంబంధాన్ని తెలియజేసే ధ్రువీకరణ పత్రం, పోస్ట్‌మార్టం రిపోర్టు, బ్యాంక్‌ అకౌంట్‌, అవసరమైతే ఎఫ్‌ఐఆర్‌ కాపీని ఇవ్వాల్సి ఉంటుంది.

క్లెయిం నమోదు

ఏదైనా అనుకోని సంఘటన జరిగితే సాధ్యమైనంత వెంటనే బీమా కంపెనీకి తెలియజేసి క్లెయిమ్‌ను రిజిస్టర్‌ చేసుకోవాలి. సమాచారాన్ని అందించేందుకు బీమా కంపెనీలు సాధారణంగా సుమారు 60 నుంచి 90 రోజుల దాకా వ్యవధి ఇస్తుంటాయి. కానీ అంతకంటే ముందే సమాచారం అందించడం మంచిది.

సక్రమంగా ప్రీమియం

బీమా పాలసీ తీసుకున్నాక.. ప్రీమియంల చెల్లింపులో జాప్యం లేకుండా చూసుకోవాలి. వీలును బట్టి నెలవారీ లేదా వార్షిక ప్రాతిపదికన చెల్లించే విధానాన్ని ఎంచుకోవచ్చు. ఒకవేళ ఏదైనా సమస్య వచ్చి ప్రీమియం చెల్లింపులు కొనసాగించడం కష్టమైనపక్షంలో ఆ విషయాన్ని బీమా కంపెనీకి తెలియజేయడం మంచిది. పాలసీదారు చెబుతున్నది వాస్తవమేనని కంపెనీ నమ్మిన పక్షంలో పాలసీలో నిబంధనలను తగు విధంగా సవరిస్తుంది.