FD Vs Debt Funds: ఫిక్స్‌డ్ డిపాజిట్, డెట్ ఫండ్స్.. వేటిలో రాబడి ఎక్కువ..!

ఫిక్స్‌డ్ డిపాజిట్లపై బ్యాంకులు అందించే వడ్డీ రేటు, సెక్యూరిటీ మెచ్యూరిటీ కాలంలో వడ్డీ రేటులో మార్పులు వచ్చినా మారదు. మీరు మీ డబ్బును 6 శాతం వడ్డీ రేటుతో 3 సంవత్సరాల పాటు ఫిక్స్‌డ్ డిపాజిట్ ఖాతాలో ఉంచినట్లయితే, మొత్తం మార్కెట్‌లోని వడ్డీ రేట్లలో మార్పులు వచ్చినా, మెచ్యూరిటీ కాలం మొత్తం మీరు అదే వడ్డీ రేటును పొందుతారు. ఇందులో వడ్డీపై పన్ను ఉంటుంది. వారి పన్ను శ్లాబ్ ప్రకారం పన్ను విధిస్తారు

ఇక డెట్ ఫండ్స్ అంటే.. ప్రధానంగా స్థిర-ఆదాయ రుణ సెక్యూరిటీలలో పెట్టుబడి పెట్టే ఓపెన్-ఎండెడ్ మ్యూచువల్ ఫండ్ పథకాలను డెట్ ఫండ్స్ గా పరిగణిస్తారు. ఈ ఫండ్స్ ట్రెజరీ బిల్లులు, ప్రభుత్వ బాండ్లు, సర్టిఫికేట్ ఆఫ్ డిపాజిట్లు, డిబెంచర్లు, కార్పొరేట్ బాండ్లు, వివిధ ఇతర మనీ-మార్కెట్ సాధనాల్లో పెట్టుబడి పెడతాయి. పెట్టుబడిపై గరిష్ట రాబడిని పొందాలనుకునే పెట్టుబడిదారులకు డెట్ ఫండ్లు ఒక ఎంపికగా ఉన్నాయి. డెట్ ఫండ్లలో పెట్టుబడికి ఏ ప్రభుత్వ సంస్థ నుంచి హామీ ఉండదు. అయితే పెట్టుబడి పెట్టిన నగదు భద్రతను, ఆయా సాధనాల క్రెడిట్ రేటింగ్ ద్వారా అంచనా వేయవచ్చు.

డెట్ ఫండ్ల నుంచి కచ్చితమైన హామీతో కూడిన రాబడి ఉండదు. ఇందులో రాబడి వడ్డీ రేటు, వడ్డీ రేటు హెచ్చుతగ్గులు, ద్రవ్య విధాన మార్పులు, ఫండ్ మేనేజర్ పెట్టుబడి నిర్ణయం వంటి వివిధ అంశాలపై ఆధారపడి ఉండవచ్చు. డెట్ ఫండ్లలో కూడా పన్ను ఉంటుంది. డెట్ ఫండ్స్, ఫిక్స్‌డ్ డిపాజిట్ల నుంచి వచ్చే రాబడి రేటు ఒకేలా ఉన్నప్పటికీ.. డెట్ ఫండ్‌ల నుంచే ఎక్కువ లాభం పొందే అవకాశం ఉందని నిపుణులు చెబుతున్నారు.