TGSRTC: గుడ్ న్యూస్ చెప్పిన ఆర్టీసీ.. ఏసీ బస్సుల్లో ఉచిత ప్రయాణం..!

నగరంలోని పలు ప్రాంతాల నుంచి ఎంజీబీఎస్ చేరుకునేందుకు చాలా సమయం పడుతుంది. మియాపూర్‌, నిజాంపేట్‌, జేఎన్‌టీయూ, గచ్చిబౌలి, కొండాపూర్‌, హఫీజ్‌పేట్‌, లింగంపల్లి, మెహిదీపట్నం తదితర ప్రాంతాల నుంచి బెంగళూరుకు వెళ్లే ప్రయాణికులు ఇబ్బందులు పడుతున్నారు. ఈ నేపథ్యంలో ప్రయాణికులకు కలుగుతున్న అసౌకర్యాన్ని తగ్గించేందుకు, సమయాన్ని ఆదా చేసేందుకు శంషాబాద్‌ వరకు ఉచిత ప్రయాణ సదుపాయం కల్పించినట్లు ఆర్టీసీ ఎండీ నాగిరెడ్డి వెల్లడించారు. ప్రయాణీకులు తమ బెంగళూరుకు ప్రయాణానికి రిజర్వేషన్ చేసుకునే సమయంలో శంషాబాద్ బోర్డింగ్ పాయింట్‌ను ఎంపిక చేసుకోవాల్సి ఉంటుంది.

రిజర్వేషన్ టికెట్‌ చూపించి AC, AJ లేదా AK పుష్పక్ ఎయిర్‌పోర్ట్ లైనర్ ఏసీ సర్వీసుల్లో క్రింది బోర్డింగ్ పాయింట్లలో ఏదైనా ఒక చోటు నుంచి శంషాబాద్ వరకు పూర్తిగా ఉచితంగా ప్రయాణించవచ్చు. తర్వాత అక్కడ తమకు రిజర్వేషన్ ఉన్న బెంగళూరు సర్వీసు బస్సు ద్వారా ప్రయాణం సాగించవచ్చని అధికారులు వెల్లడించారు. జేబీఎస్, సికింద్రాబాద్, ప్రకాశ్ నగర్, పర్యాటక్ భవన్, కేర్ ఆస్పత్రి, ఎన్ఎండీసీ, మెహదీపట్నం, అరంఘర్, మీయపూర్, నిజాంపేట, జేఎన్టీయూ, మలేషియా, శిల్పారామం, బయో డైవర్సిటీ, గచ్చిబౌలి, లింగంపల్లి, మదినగూడ, అల్వీన్ ఎక్స్ రోడ్, హఫీజ్ పేట, కొండాపూర్, కొత్తగూడ ఎక్స్ రోడ్, బోటనికల్ గార్డెన్ వద్ద బస్ ఎక్కొచ్చు.