TCS ఉద్యోగులకు అలర్ట్.. ఢిల్లీ క్యాంపస్ ఉద్యోగులు కొత్త కార్యాలయం నుంచి పనిచేయాలని ఆదేశాలు..కారణం ఏంటంటే..

టీసీఎస్ తన సెంట్రల్ ఢిల్లీ కార్యాలయంలో పనిచేస్తున్న ఉద్యోగులకు తాత్కాలికంగా ప్రత్యామ్నాయ పని ఏర్పాట్లను ప్రకటిస్తూ అంతర్గత మార్గదర్శకాలతో కూడిన ఒక సలహా పత్రాన్ని జారీ చేసింది. సెంట్రల్ ఢిల్లీలోని 'పిటిఐ (PTI) బిల్డింగ్ క్యాంపస్'కు కేటాయించిన అసోసియేట్‌లందరికీ ఈ నూతన ఆదేశాలు వర్తిస్తాయని సంస్థ స్పష్టం చేసింది. జూలై 23, జూలై 24 తేదీలలో అమలులో ఉండేలా జారీ చేసిన ఈ అత్యవసర మార్గదర్శకాల ప్రకారం.. ఉద్యోగులు ఎవరూ కూడా ఢిల్లీలోని పిటిఐ బిల్డింగ్ ఆఫీసుకు రానవసరం లేదని తెలిపింది. దానికి బదులుగా ఉద్యోగులు నోయిడా లేదా గురుగ్రామ్‌లలో ఉన్న కంపెనీ ఇతర ప్రధాన కార్యాలయాల నుండి విధులకు హాజరు కావాలని సూచించింది.

టీసీఎస్ క్యూ1 ఫలితాలు.. రూ. 13,300 కోట్లు దాటిన లాభాలు.. ఇన్వెస్టర్లకు ఒక్కో షేరుకు రూ. 12 డివిడెండ్ ప్రకటన..

ఒకవేళ క్షేత్రస్థాయిలోని నిరసనలు, రహదారుల మూసివేత లేదా రవాణా సౌకర్యాల లేమి కారణంగా నోయిడా లేదా గురుగ్రామ్ నగరాల్లోని కార్యాలయాలకు కూడా చేరుకోలేని పరిస్థితి ఉంటే.. అలాంటి ఉద్యోగుల కోసం కంపెనీ మరో కీలక వెసులుబాటును కల్పించింది. అటువంటి తీవ్ర ప్రతికూల పరిస్థితులు ఎదుర్కొంటున్న సిబ్బంది విపత్తు అత్యవసర పరిస్థితి వర్గం కింద వర్క్-ఫ్రమ్-ఆఫీస్ మినహాయింపు కోసం దరఖాస్తు చేసుకోవచ్చని తెలిపింది. దీని ద్వారా ఆఫీసుకు హాజరుకావడం నుండి మినహాయింపు పొంది ఇంటి వద్ద నుంచే సురక్షితంగా పని చేసుకునే అవకాశం లభిస్తుంది.

జంతర్ మంతర్ పరిసరాల్లో చోటుచేసుకున్న ఈ విద్యార్థి ఆందోళనలు తమ కార్యాలయ సాధారణ సేవలకు, ప్రాజెక్ట్ డెలివరీలకు విఘాతం కలిగించకుండా ఉండటంతో పాటు, ప్రధానంగా తమ సిబ్బంది ప్రయాణ సమయాల్లో ఎలాంటి భద్రతాపరమైన ఇబ్బందులు లేదా అసౌకర్యాలు ఎదుర్కొకుండా ఉండేందుకే టీసీఎస్ ఈ ముందస్తు జాగ్రత్త చర్యలు చేపట్టింది. ఐటీ రంగానికి చెందిన పెద్ద పెద్ద కంపెనీలు తమ వ్యాపార పరిరక్షణ ప్రణాళికలో భాగంగా బిజినెస్ కంటిన్యూటీ ప్లాన్ ను అమలు చేస్తుంటాయి. ఇందులో భాగంగానే టీసీఎస్ కూడా ఢిల్లీ నిరసనల సంక్షోభ సమయంలో అత్యంత వేగంగా స్పందించి.. ప్రత్యామ్నాయ కార్యాలయ మార్గాలను ఉద్యోగులకు అందుబాటులోకి తెచ్చింది.

సెంట్రల్ ఢిల్లీ పరిసర ప్రాంతాల్లో విద్యార్థుల నిరసన ఉద్యమం సుదీర్ఘంగా కొనసాగే సంకేతాలు కనిపిస్తుండటంతో.. కేవలం టీసీఎస్ మాత్రమే కాకుండా సమీపంలోని ఇతర కార్పొరేట్ సంస్థలు కూడా తమ సిబ్బంది భద్రత కోసం ఇదే విధమైన డబ్ల్యూఎఫ్ఓ మినహాయింపులను లేదా వర్క్ ఫ్రమ్ హోమ్ వెసులుబాట్లను పరిశీలిస్తున్నాయి. రవాణా అంతరాయాలు ఉన్నప్పటికీ ఉద్యోగులు సురక్షితంగా ఉంటూ తమ విధులను కొనసాగించేందుకు టీసీఎస్ తీసుకున్న ఈ నిర్ణయం సమయోచితమైనదిగా పరిగణించబడుతోంది. పరిస్థితి పూర్తిగా అదుపులోకి వచ్చి.. వీధుల్లో సాధారణ పరిస్థితులు నెలకొనే వరకు ఉద్యోగులు తమ ఆరోగ్యాలు, భద్రతలను ప్రాధాన్యతగా ఉంచుకుని కంపెనీ జారీ చేసిన ప్రత్యామ్నాయ మార్గదర్శకాలకు అనుగుణంగా నడుచుకోవాలని యాజమాన్యం స్పష్టం చేసింది.