బంగారం, వెండి ధరల తగ్గుదలపై గుడ్ న్యూస్.. వచ్చే వారం పసిడి మార్కెట్ ఎలా ఉండబోతుందంటే...

సాధారణంగా ప్రపంచంలో ఎక్కడైనా యుద్ధ మేఘాలు కమ్ముకున్నప్పుడు లేదా భౌగోళిక రాజకీయ ఉద్రిక్తతలు తలెత్తినప్పుడు సురక్షితమైన పెట్టుబడిగా భావించే బంగారం వైపు ఇన్వెస్టర్లు మొగ్గు చూపుతారు, దీనివల్ల ధరలు పెరుగుతాయి. కానీ ఈ వారం పరిస్థితులు పూర్తిగా భిన్నంగా మారాయి. అమెరికా అధ్యక్షుడు డొనాల్డ్ ట్రంప్ ఇరాన్‌పై నావికా దిగ్బంధనాన్ని తిరిగి విధిస్తామని హెచ్చరించడం, దానికి ప్రతిచర్యగా హార్ముజ్ జలసంధిని మూసివేస్తున్నట్లు ఇరాన్ ప్రకటించడంతో ముడి చమురు ధరలు ఈ ఒక్క వారంలోనే ఏకంగా 12 శాతం మేర భగ్గుమన్నాయి.

ఈ విధంగా చమురు ధరలు పెరగడం వల్ల ప్రపంచవ్యాప్తంగా ద్రవ్యోల్బణం మళ్లీ తీవ్రస్థాయికి చేరుతుందేమోనని మార్కెట్ వర్గాలు భయపడ్డాయి. ద్రవ్యోల్బణం పెరిగితే దానిని అదుపు చేయడానికి అమెరికా ఫెడరల్ రిజర్వ్ (US Fed) రాబోయే జూలై 28-29 సమావేశంలో వడ్డీ రేట్లను సుదీర్ఘకాలం పాటు అధికంగా ఉంచడమే కాకుండా, మరింత పెంచే అవకాశం ఉందనే అంచనాలు బలపడ్డాయి.

బంగారం రూ.1.45 లక్షలు, వెండి రూ.2.27 లక్షలు.. గోల్డ్, సిల్వర్ ధరలపై నిపుణులు తాజా అంచనాలు ఇవే..

జూన్ నెలకు సంబంధించిన అమెరికా రిటైల్ ద్రవ్యోల్బణం 3.5% కి తగ్గి మంగళ, బుధవారాల్లో కొంత ఊరటనిచ్చినప్పటికీ, నిరంతరం పెరుగుతున్న చమురు ధరల వల్ల భవిష్యత్తులో ద్రవ్యోల్బణం మళ్లీ పెరుగుతుందనే భయాలు ఇన్వెస్టర్లను వెంటాడాయి. బంగారంపై ఎలాంటి వడ్డీ లభించదు కాబట్టి.. అధిక వడ్డీ రేట్ల వాతావరణంలో డాలర్, అమెరికా బాండ్ల రాబడులు బలపడి, డబ్బు అంతా బంగారం నుండి వడ్డీనిచ్చే ఇతర పెట్టుబడుల వైపు మళ్లుతుంది. ప్రస్తుతం డిసెంబర్ నాటికి ఫెడ్ వడ్డీ రేట్లు పెంచుతుందనే సంభావ్యత 73 శాతానికి చేరడం వల్లనే యుద్ధ భయం ఉన్నప్పటికీ బంగారం ధరలు పడిపోయాయి.

వచ్చే వారం (జూలై 20 నుండి 24) మార్కెట్ సరళిని గమనిస్తే.. ప్రారంభంలో రెండు లోహాలు కొంత ఒత్తిడిలోనే ఉండే అవకాశం ఉందని సాంకేతిక విశ్లేషణలు సూచిస్తున్నాయి. మార్కెట్ నిపుణుల ప్రకారం ఎంసీఎక్స్ బంగారానికి రూ. 1,39,600, రూ. 1,38,800 మధ్య కీలకమైన మద్దతు ఉంది. ఒకవేళ ధర రూ. 1,38,800 స్థాయి కంటే దిగువకు పడిపోతే పతనం మరింత వేగవంతం కావచ్చు. పైవైపున రూ. 1,41,100 నుండి రూ. 1,42,000 వద్ద బలమైన నిరోధకత (Resistance) ఉంది. బంగారం తిరిగి రూ. 1,42,000 మార్కును దాటితేనే కొత్త కొనుగోళ్లు ప్రారంభమై ధరలు కోలుకుంటాయి. అంతర్జాతీయ మార్కెట్లో కూడా 4 వేల డాలర్ల స్థాయి అత్యంత కీలకమైనదిగా మారనుంది.

అలాగే వెండి విషయానికి వస్తే, పారిశ్రామిక రంగాలు, సౌరశక్తి, ఎలక్ట్రిక్ వాహనాలు, ఆర్టిఫిషియల్ ఇంటెలిజెన్స్ (AI) హార్డ్‌వేర్ నుండి దీర్ఘకాలిక డిమాండ్ సానుకూలంగా ఉన్నప్పటికీ, స్వల్పకాలంలో అస్థిరత ఎక్కువగా ఉంటుంది. వెండికి రూ. 2,14,000 నుండి 2,11,100 వద్ద మద్దతు లభిస్తుండగా.. ఒకవేళ ధర రూ. 2,11,100 కంటే కిందకు పడిపోతే మరింత బలహీనపడుతుంది. పైవైపున రూ. 2,18,800 మనుండి రూ.2,21,000 నిరోధకతలను దాటితేనే వెండి ధర రూ. 2,24,000 నుండి రూ. 2,26,000 వరకు పుంజుకునే అవకాశం ఉంటుంది.

వచ్చే వారం జూలై 20న అమెరికా ఆర్థిక సూచికలు, జూలై 23న నిరుద్యోగ భృతి దరఖాస్తుల డేటా, జూలై 24న మాన్యుఫ్యాక్చరింగ్ పీఎంఐ (PMI) గణాంకాలు విడుదల కానున్నందున, ఈ నివేదికలు మార్కెట్ గమనాన్ని నిర్దేశిస్తాయి. ఈ నేపథ్యంలో, సాధారణ వినియోగదారులు లేదా పెళ్లిళ్ల కోసం నగలు కొనేవారు ఒకేసారి కాకుండా, ప్రస్తుత తగ్గుదలని ఆసరాగా చేసుకుని చిన్న మొత్తాలలో (25% నుండి 30% వరకు) వాయిదాల పద్ధతిలో కొనుగోలు చేయడం సురక్షితమైన వ్యూహం కాగలదు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.