టాప్ ఐటీ కంపెనీల్లో త‌గ్గిన నియామ‌కాలు

దేశంలోని ప్ర‌ముఖ ఐటీ కంపెనీల్లో నియామకాలు భారీగా తగ్గాయి. ప్రస్తుత ఆర్థిక సంవత్సరం సెప్టెంబరు త్రైమాసికంలో దేశంలోని నాలుగు అగ్రశ్రేణి సాఫ్ట్‌వేర్ సంస్థ‌ల్లో నియామకాలు ఏకంగా 43 శాతం తగ్గినట్లు కొటక్‌ ఇనిస్టిట్యూషనల్‌ ఈక్విటీస్‌ నివేదిక వెల్లడించింది. ఈ కంపెనీల పనితీరు నిరాశజనకంగా ఉండటంతో పాటు మందగమనంలోకి జారుకోవటంతో నియామకాలు భారీగా తగ్గాయని పేర్కొంది.

సెప్టెంబరు త్రైమాసికంలో ఈ నాలుగు కంపెనీలు కేవలం 14,421 మందిని మాత్రమే నియమించుకున్నాయని కొటక్‌ నివేదిక తెలిపింది. గత ఏడాదితో పోల్చితే ఇది 43 శాతం తక్కువని పేర్కొంది. కాగా ప్రస్తుత ఆర్థిక సంవత్సరం మొద‌టి ఆరు నెలల్లో ఈ కంపెనీల్లో నియామకాలు 24 శాతం తగ్గుదలతో 29,686గా ఉన్నాయని వెల్లడించింది. ఉత్పాదకతను పెంచుకోవటంపై దృష్టిపెట్టటంతో పాటు వృద్ధి ఆశించిన స్థాయిల్లో ఉండకపోవటం వంటి అంశాలు నియామకాలపై తీవ్ర ప్రభావాన్ని చూపించాయని కోటక్ పేర్కొంది. కాగా ద్వితీయ త్రైమాసికంలో సాఫ్ట్‌వేర్‌ కంపెనీల ఫలితాలు పూర్తి నిరాశాజనకంగా ఉన్నాయని, సూక్ష్మ ఆర్థిక పరిస్థితులు మెరుగ్గా లేకపోవటంతో పనితీరుపై ప్రభావం పడిందని నివేదిక వెల్లడించింది. టెలికాం విభాగం మినహా ఇతర అన్ని విభాగాల పనితీరుపై ఈ ప్రభావం కనిపించిందని వివ‌రించింది.