బీమా పాలసీల‌ను ఎల‌క్ట్రానిక్ రూపంలోకి ఎందుకు మార్చుకోవాలంటే?

పాల‌సీ దొంగ‌త‌నం:

పాల‌సీ ప‌త్రాన్ని ఎవ‌రైనా దొంగ‌త‌నం చేసే అవ‌కాశం ఉంది. డూప్లికేట్ పాల‌సీ పొందాలంటే ఒక ప‌ద్ద‌తి ఉంటుంది. అందుకోసం మొద‌ట పోలీసుల‌కు ఫిర్యాదు చేయాలి.

అదే పాల‌సీని ఎల‌క్ట్రానిక్ రూపంలో ఉంచుకుంటే ఈ ఇబ్బంది ఉండ‌దు.

పోగొట్టుకోవ‌డం:

పాల‌సీ ప‌త్రం పాత‌దై చిరిగిపోవ‌డం, నీళ్ల‌లో ప‌డి త‌డిచిపోవ‌డం వంటి అవ‌కాశాల‌ను కొట్టిపారేయ‌లేం. ఒక్కోసారి ఎక్క‌డో పెట్టామో గుర్తు ఉండ‌క పాల‌సీ ప‌త్రం పోయింద‌ని కంగారు ప‌డుతుంటాం. ఎల‌క్ట్రానిక్ రూపంలో ఉన్న వాటికి భ‌ద్ర‌త ఉంటుంది.

ఉచితం :

ఇన్సూరెన్స్ రిపాజిట‌రీలైన క‌ర్వీ, సీఎస్‌డీఎల్‌, క్యామ్స్ వంటి సంస్థ‌లు ఎల‌క్ట్రానిక్ రూపంలో భ‌ద్ర‌ప‌రుచుకునే సౌక‌ర్యాన్ని ఉచితంగా అంద‌జేస్తున్నాయి.

సుల‌భత‌ర‌ విధానం:

పాల‌సీని తీసుకునేట‌ప్పుడు ఎంచుకునే ఆప్ష‌న్‌లో డీమ్యాట్ ఫార్మ‌ట్‌ను ఎంచుకోవాలి. డాక్యుమెంట్లు, పాల‌సీ కొనుగోలు విధానం అన్నీ మామూలుగానే చేయాలి. కాక‌పోతే మీ స‌ర్టిఫికెట్ ఎల‌క్ట్రానిక్ రూపంలో పొందే వీలుంటుంది.

ఎక్కువ పాల‌సీల‌ను భ‌ద్ర‌ప‌ర‌చ‌వ‌చ్చు:

ఈ విధంగా ఎల‌క్ట్రానిక్ రూపంలో ఎక్కువ పాల‌సీల‌ను భ‌ద్ర‌ప‌రుచుకునే స‌దుపాయం ఉంటుంది. దీంతో ఏ ఏ పాల‌సీలు కొన్నామో గుర్తుంచుకుంటే వాటి నంబ‌ర్ల‌ను ఆన్‌లైన్‌లోనే చూసుకోవ‌చ్చు. అన్ని పాల‌సీల‌ను ఎప్పుడు కావాలంటే అప్పుడు చూసే వీలుంటుంది.

పాల‌సీ కేర్‌టేక‌ర్‌ను నియ‌మించుకునే వీలు:

మీ పాల‌సీల‌కు సంబంధించి కేర్ టేక‌ర్‌ను నియ‌మించుకోవ‌చ్చు. ఒక‌వేళ పాల‌సీదారు మ‌ర‌ణిస్తే కేర్‌టేక‌ర్ నామినీకి విష‌యాన్ని చేర‌వేస్తారు. నామినీలు క్లెయిం చేసుకోవ‌చ్చు. ఒక్కోసారి పాల‌సీల‌ను ఎవ‌రూ క్లెయిం చేసేవారు లేర‌ని చెబుతున్న సంఘ‌ట‌న‌లు ఆశ్చ‌ర్యాన్ని క‌లిగిస్తాయి. అందువ‌ల్లే ఈ విధానాన్ని ఉప‌యోగించి ఆ ప్ర‌మాదం నుండి బ‌య‌ట‌ప‌డండి.

పాల‌సీ మెచ్యూర్ అయితే గుర్తు చేస్తారు

పాల‌సీల తేదీ ముగిసేట‌ప్పుడు ఆన్‌లైన్‌లో మీకు తెలియ‌ప‌రుస్తారు. దీంతో సౌక‌ర్య‌వంతంగా, సులువుగా ఉంటుంది.

నెట్ సౌక‌ర్యం ఉంటే ఎక్క‌డైనా:

మీరు డెస్క్‌టాప్‌; ల‌్యాప్‌ట్యాప్‌; ట‌్యాబ్‌, మొబైల్ వంటి సాధనాల్లో ఇంట‌ర్నెట్ సౌక‌ర్యం ఉంటే పాల‌సీల‌ను చెక్ చేసుకోవ‌చ్చు.

4 రిపాజిట‌రీలు:

దేశ‌వ్యాప్తంగా క్యామ్స్‌(CAMS), క‌ర్వీ, ఎన్ఐఆర్‌(నేష‌న‌ల్ ఇన్సూరెన్స్ రిపాజిట‌రీ), సెంట్ర‌ల్ డిపాజిట‌రీల్లో పాల‌సీల‌ను ఆన్‌లైన్ రూపంలో భ‌ద్ర‌ప‌రుచుకునేందుకు అవకాశం ఉంది.

పాల‌సీదారులు నేరుగా బీమా కంపెనీని లేదా ఈ రిపాజిట‌రీల‌ను సంప్ర‌దించ‌డం ద్వారా పాల‌సీల‌ను ఎల‌క్ట్రానిక్ రూపంలో మార్చుకోవ‌చ్చు. ఇప్ప‌టికే ఉన్న పాల‌సీల‌ను సైతం మార్చుకోవ‌చ్చు. బీమా కంపెనీని సంప్ర‌దించి ఈ-ఇన్సూరెన్స్ ఖాతా గురించి అడ‌గండి.